BAKI,VOA
Belçika hökuməti İran ətrafında yaranmış gərginlik fonunda ABŞ və İsrailin hərbi əməliyyatlarına qoşulmayacağını açıqlayıb.
VOA xəbər verir ki, Belçikanın müdafiə naziri Teo Frankken parlamentdə keçirilən dinləmələr zamanı ölkəsinin ABŞ və İsrailin İrana qarşı həyata keçirdiyi hücumlara hərbi dəstək verməyəcəyini bildirib.
Belçika Federal Parlamentinin Nümayəndələr Palatasının Müdafiə Komissiyasında çıxış edən nazir qeyd edib ki, sözügedən hücumlar beynəlxalq hüquqa uyğun hesab olunmur.
Teo Frankken bildirib ki, hələlik rəsmi yardım müraciəti daxil olmayıb. Bununla belə, İordaniya və ya Birləşmiş Ərəb Əmirlikləri kimi ölkələr beynəlxalq hüquqa uyğun müraciət edərsə, Belçika həmin ölkələrə dəstək verməyə hazır ola bilər.
Bununla yanaşı, Frankken ABŞ və İsrailə hərbi dəstək məsələsinin fərqli olduğunu vurğulayaraq bildirib ki, Belçika bu ölkələrin İrana qarşı həyata keçirdiyi hücumlarda iştirak etməyi planlaşdırmır.