BAKI, AzerVoice, Orxan Qədirzadə
HƏMAS VƏ Fəth hərəkatı Misirin paytaxtı Qahirədə Trampın Qəzza planını müzakirə edib.
AzerVoice xəbər verir ki, Misirin paytaxtı Qahirədə “HƏMAS” və “Fəth” nümayəndə heyətləri arasında görüş keçirilib. Görüşdə atəşkəs sazişinin ikinci mərhələsi və Qəzza zolağının gələcək idarəçiliyi ilə bağlı məsələlər müzakirə olunub.
Misir kəşfiyyatının vasitəçiliyi ilə keçirilən danışıqlar “müsbət atmosferdə” keçib. Xüsusilə Qəzzanın idarəçiliyi və hakimiyyətin ötürülməsi məsələlərində tərəflərin mövqelərinin yaxınlaşdığı bildirilir.
Görüşdə iştirak edən Fələstin Dövlətinin Prezident köməkçisi Hüseyn əş-Şeyx yaxın günlərdə Qahirədə planlaşdırılan geniş milli dialoqa hazırlıq məqsədilə prezident Mahmud Abbasa məruzə təqdim edəcək.
Görüşdə müzakirə edilən əsas məsələlərə Qəzzada müvəqqəti idarə heyətinin yaradılması, yenidənqurma prosesinə beynəlxalq nəzarət mexanizminin qurulması və atəşkəsin BMT-nin himayəsi altında monitorinqi daxildir.
Tərəflər həmçinin Fələstin milli birliyinin bərpası və Fələstin Azadlıq Təşkilatının (FAT) bütün fraksiyalarını əhatə edən yeni siyasi strategiya üzərində razılığa gəlməyin vacibliyini vurğulayıblar.
Həmçinin Qahirə də Fələstinli tərəfləri birləşdirməyə yönəlmiş təzyiqləri artırıb.
Görüşlə eyni vaxtda ABŞ Prezidenti Donald Tramp “Time” jurnalına müsahibəsində 20 ildən artıqdır həbsdə olan fələstinli siyasətçi Mərvan əl-Bərqusinin azad olunması məsələsini nəzərdən keçirdiyini bildirib.
HƏMAS və digər fələstinli qruplarla yaxşı əlaqələrə sahib olan Əl-Bərqusinin sərbəst buraxılması Fələstin fraksiyalarını birləşdirə biləcək mühüm addım kimi qiymətləndirilir.