BAKI, AzerVoice, Nailə Babazadə
ABŞ-da federal hökumət, yeni maliyyə ili başlamazdan əvvəl Konqresin keçici büdcə layihəsini təsdiq edə bilməməsi səbəbilə bağlanıb. Bu, 2019-cu ildən bəri ilk dəfə federal hökumətin rəsmi şəkildə fəaliyyətini dayandırmasıdır.
AzerVoice xəbər verir ki, 2025-ci maliyyə ilinin 30 sentyabrda başa çatması ilə yeni büdcə planı üzərində razılıq əldə olunmayıb. Nümayəndələr Palatası daha əvvəl 21 noyabra qədər maliyyə təmin edən keçici büdcə layihəsini qəbul etsə də, Senat həm demokratların, həm də respublikaçıların təkliflərini rədd edib.
Demokratlar səhiyyə xərcləri və sosial proqramlara daha çox vəsait ayrılmasını tələb edərkən, respublikaçılar mövcud xərclər çərçivəsində davam etməyi təklif ediblər. Hər iki tərəfin təklifləri lazımi səs çoxluğunu toplaya bilməyib.
ABŞ Prezidenti Donald Tramp hökumətin bağlanacağını əvvəlcədən bildirmiş və bunun nəticəsində çox sayda dövlət işçisinin işdən çıxarıla biləcəyini qeyd etmişdi.
ABŞ Konqresinin Büdcə Ofisinə görə, hökumətin bağlanması nəticəsində təxminən 750 min federal işçi məzuniyyətə göndərilə bilər.
Qanunvericiliyə əsasən, konqres yeni maliyyə ili başlamazdan əvvəl büdcəni təsdiqləmədikdə, hökumət yalnız "əsas xidmətlər" istisna olmaqla digər fəaliyyətlərini dayandırır. Əsas xidmətlərə ordu, kəşfiyyat, hava limanları, dövlət xəstəxanaları və həbsxanalar daxildir. Bu sahələrdə çalışanlar maaşlarını ancaq yeni büdcə qəbul edildikdən sonra ala bilirlər.
Qeyd edək ki, 1981-ci ildən bəri ABŞ-da 10 qısa və 4 uzunmüddətli hökumət bağlanması baş verib. Ən uzun müddətli bağlanma isə 2018-ci ilin dekabrından 2019-cu ilin yanvarına qədər, 35 gün davam etmişdi.