BAKI,VOA,Yusif Şərifzadə

İran parlamentinin sədri və Tehranın baş danışıqçısı Məhəmməd Baqir Qalibaf ABŞ-ni İsrailin maraqları naminə bölgədəki müttəfiqlərinin təhlükəsizliyini riskə atmaqda ittiham edib. O, İranın qonşu ölkələrdən yeni regional təhlükəsizlik mexanizmlərinin yaradılması ilə bağlı çoxsaylı müraciətlər aldığını bildirib.

VOA xəbər verir ki, Məhəmməd Baqir Qalibaf sosial şəbəkədə yaydığı açıqlamada Tehranla qonşu ölkələr arasında yeni təhlükəsizlik mexanizmlərinin formalaşdırılması və regional iqtisadi əməkdaşlığın genişləndirilməsi məsələlərinin gündəmə gəldiyini bildirib.

Qalibafın sözlərinə görə, İran bu istiqamətdə qonşu dövlətlərdən “çoxsaylı mesajlar” alıb. O, həmin ölkələrin adlarını və təklif olunan təhlükəsizlik mexanizmlərinin təfərrüatlarını açıqlamayıb.

“ABŞ zorakı siyasəti və müttəfiqlərinin maraqlarını tamamilə nəzərə almaması ilə İsrail naminə öz müttəfiqlərinin hər birinin təhlükəsizliyini elə riskə atdı ki, onlar qısa müddət ərzində bütün mövcudluqlarının təhlükə altında olduğunu gördülər”, – Qalibaf bildirib.

İran parlamentinin sədri bölgənin təhlükəsizliyinin xarici qüvvələrdən asılı olmayan yeni regional sistem vasitəsilə təmin edilməli olduğunu müdafiə edib.

“Yerli imkanlara əsaslanan və müstəqil nizam həqiqətən sülh və təhlükəsizliyi təmin edə biləcək yoldur”, – Qalibaf vurğulayıb.

Onun açıqlaması Tehran rəhbərliyinin son dövrdə irəli sürdüyü regional təhlükəsizlik yanaşması ilə səsləşir. İran bölgə dövlətlərinin təhlükəsizlik məsələlərində xarici qüvvələrdən asılılığının azaldılmasını və regional ölkələr arasında birbaşa əməkdaşlığın genişləndirilməsini müdafiə edir.

Qalibafın sözlərinə görə, yeni təhlükəsizlik mexanizmləri ilə yanaşı, iqtisadi əməkdaşlığın genişləndirilməsi də İranın qonşu dövlətlərlə müzakirə etdiyi əsas istiqamətlər sırasındadır.