BAKI, AzerVoice, Nailə Babazadə
ABŞ Prezidenti Donald Tramp İsrailin Qətərə təkrar hücum etməyəcəyini söyləyib.
AzerVoice xəbər verir ki, Tramp Oval Ofisdə jurnalistlərin suallarını cavablandırarkən İsrailin Qətərə endirdiyi hava hücumu ilə bağlı danışıb.
Qətərin "çox yaxşı bir müttəfiq olduğunu və bir çox insanın bunun fərqində olmadığını" deyən Tramp, İsrail Baş naziri Benyamin Netanyahunun Qətərə yenidən hücum etməyəcəyini bildirib.
Tramp, İsrailin HƏMAS-a qarşı başqa tədbirlərə əl atacağını vurğulayaraq, “Netanyahunun Qətəri vurmayacağını, bəlkə də onların (HƏMAS-ın) ardınca gedəcəyini” ifadə edib.
ABŞ mərkəzli Axios xəbər saytının adının açıqlanmasını istəməyən israilli rəsmilərə istinadən yaydığı xəbərdə, ABŞ-ın, iddia edildiyi kimi Qətər hücumundan “son anda deyil”, daha əvvəl məlumatlı olduğu bildirilib.
Xəbərə görə, israilli rəsmilər Netanyahu ilə Trampın ABŞ vaxtı ilə saat 08:00-da telefonla danışdığını, Qətərə hücumun isə saat 08:51-də baş verdiyini, Trampın bu hücuma “yox” demədiyini qeyd ediblər.
ABŞ Prezidenti Tramp, həmin hücumdan xəbərdar olub-olmaması ilə bağlı suala “Xeyr” cavabını vermiş və Qətəri “önəmli bir tərəfdaş” olaraq xarakterizə etmişdi.
ABŞ rəsmiləri isə raketləri havada gördüklərini, İsraildən açıqlama istədiklərini və bu yolla hücumdan xəbərdar olduqlarını irəli sürmüşdülər.
ABŞ-ın hücumdan xəbər tutmasından sonra isə Trampın Yaxın Şərq üzrə xüsusi nümayəndəsi Stiv Vitkoffun Qətəri məlumatlandırmaq istədiyi, lakin gecikdiyi iddia olunub.
Qeyd edək ki, İsrail ordusu 9 sentyabr tarixində Dohada HƏMAS-ın danışıqlar heyətinin yerləşdiyi binaya döyüş təyyarələri ilə hücum etmişdi.
HƏMAS rəhbərliyinin xilas olduğu bu hücumda, HƏMAS Siyasi Bürosunun üzvü Halil əl-Hayyenin oğlu, 4 HƏMAS üzvü və bir qətərli polis olmaqla 6 nəfər həlak olmuşdu.
İsrail Baş naziri Benyamin Netanyahu isə 10 sentyabrda verdiyi açıqlamada Qətərə, “Ya onları ölkədən çıxarırsınız, ya da ədalətə təslim edirsiniz. Əgər bunu etməsəniz, biz edəcəyik.” sözləri ilə yeni hücum təhdidi etmişdi.