BAKI,VOA,Yusif Şərifzadə
Yaxın Şərqdə artan hərbi gərginlik fonunda Körfəz ölkələri və İordaniya silahlı qüvvələrini yüksək hazırlıq vəziyyətində saxlayır.
VOA xəbər verir ki, bölgədə əsas narahatlıq ABŞ-ın İranın mülki və enerji infrastrukturuna mümkün zərbələrinin qarşılıqlı hərbi cavab tədbirlərinə səbəb ola biləcəyidir.
Təhlillərə görə, belə bir ssenaridə İranın bölgədə yerləşən enerji və strateji obyektləri hədəfə ala biləcəyi ehtimalı nəzərdən keçirilir.
Məlumata görə, mart ayında İsrailin İranın Cənubi Pars qaz yatağını hədəfə almasından sonra İran Qətərin Rəs Ləffan Sənaye Şəhərinə raket zərbəsi endirmişdi.
Bildirilir ki, həmin hücum nəticəsində iki mayeləşdirilmiş təbii qaz istehsal qurğusu sıradan çıxmış və Qətərin mayeləşdirilmiş təbii qaz istehsal gücünün təxminən 17 faizi müvəqqəti olaraq dayanmışdı.
Bölgə ölkələri fevral, mart və aprel aylarında yaşanan gərginliyin yenidən təkrarlanmasını istəmədiklərini bildirirlər.
Bu səbəbdən Qətər nümayəndələrinin İrana səfərləri və Omanın ev sahibliyi etdiyi danışıqlar bölgədə gərginliyin azaldılmasına yönəlmiş diplomatik səylər kimi qiymətləndirilir.
Mövzu ilə bağlı tərəflər arasında diplomatik təmasların davam etdiyi bildirilir.