BAKI, AzerVoice, Nərmin Ağayeva

Avropa İttifaqı (Aİ) Rusiyanın Ukraynaya qarşı son hücumlarını pisləyərək, 19-cu sanksiyalar paketi üzərində işləri sürətləndirdiyini açıqlayıb.

AzerVoice xəbər verir ki, avqustun 27-də Macarıstan istisna olmaqla, Aİ-yə üzv 26 ölkə Rusiyanın Kiyev də daxil olmaqla Ukraynanın çoxsaylı şəhərlərinə hücumlarını qınayan ortaq bəyanat yayıb. Bəyanatda Rusiyanın mülki əhaliyə və obyektlərə qarşı hücumlarının müharibə cinayəti olduğu vurğulanıb. Kiyevdəki Aİ nümayəndəliyi binasına və British Council binasına ziyan dəydiyi, diplomatik personalın həyatının təhlükəyə atıldığı qeyd edilərək, bunun Vyana Konvensiyasının pozulması olduğu bildirilib.

Aİ, Ukraynanın 2025-ci ilin martından etibarən qeyd-şərtsiz atəşkəsə sadiq qaldığını, lakin Rusiyanın hücumları gücləndirdiyini iddia edib. “Rusiya ölümlərə son qoymalı və sülh iradəsi göstərməlidir,” – deyə bəyanatda vurğulanıb. Aİ, Ukraynaya dəstəyini davam etdirəcəyini və 19-cu sanksiyalar paketi ilə Rusiyaya təzyiqi artıracağını açıqlayıb. Bu sanksiyaların hazırlanmasında ABŞ ilə əməkdaşlıq xüsusi olaraq qeyd olunub.

Qeyd edək ki, Avropa diplomatiyasının rəhbəri Kaya Kallas, əvvəllər bildirmişdi ki, Rusiya qeyd-şərtsiz atəşkəsə razılaşmayana qədər sanksiyalar siyasəti davam edəcək.