BAKI, AzerVoice, Fərid Mikayılov

Rusiya Xarici İşlər Nazirliyi Fransa, Almaniya və Böyük Britaniyanın (E3) BMT-nin sanksiyalarını bərpa etmək üçün “Snapback” mexanizmini işə salmaq qərarını sərt şəkildə pisləyib.

AzerVoice xəbər verir ki, Moskvanın avqustun 29-da yaydığı açıqlamada bildirilir ki, Avropa üçlüyünün bu addımı hüquqi əsasdan məhrumdur və beynəlxalq ictimaiyyət tərəfindən rədd edilməlidir.

Nazirlik bəyan edib ki, Böyük Britaniya, Almaniya və Fransanın bu cəhdləri diplomatik səyləri zəiflədən, İranın nüvə proqramının sülh məqsədləri ilə bağlı şübhələri aradan qaldırmaq istiqamətindəki addımları əngəlləyən “ciddi təxribatçı faktor” kimi qiymətləndirilir.

“İyunda İrana qarşı baş verən xarici təcavüzün də göstərdiyi kimi, gərginliyin daha da dərinləşməsi beynəlxalq sülh və təhlükəsizlik üçün ağır nəticələr doğura bilər” – deyə nazirlik bəyan edib.

Rusiya tərəfi həmçinin Avropa ölkələrinin BMT Təhlükəsizlik Şurasının 2231 saylı qətnaməsinin hüquqi çərçivəsi kənarında hərəkət etməsini və öhdəlikləri pozaraq digər dövlətləri birtərəfli mövqeyə yönəltməsini “qəbuledilməz və qınanmalı” adlandırıb.

Nazirlik sonda Avropa ölkələrini “yanlış qərarlarını” yenidən nəzərdən keçirməyə çağıraraq, əks halda bu addımların “geridönməz nəticələr və yeni faciələrə” yol aça biləcəyini vurğulayıb.