BAKI, AzerVoice

İsrail və İran arasında artan münaqişə təhlükəsizlik vəziyyətini pisləşdirdiyi üçün Çin öz vətəndaşlarına İsraili tərk etmələri barədə xəbərdarlıq edib.

AzerVoice xəbər verir ki, Çinin Tel-Əvivdəki səfirliyi korporativ WeChat hesabında ölkədəki vətəndaşlarına təhlükəsizlik xəbərdarlığı edib.

Bəyanatda "Hazırki İsrail-İran münaqişəsi kəskinləşməkdə davam edir. Mülki itkilər artır, mülki obyektlərə ziyan dəyir, təhlükəsizlik vəziyyəti daha da pisləşir", - ifadələrinə yer verilib.

Səfirlik vətəndaşlara İsrail hava məkanı bağlı olduğu üçün İordaniya sərhədindəki gömrük qapılarından quru yolu ilə çıxmağı tövsiyə edib.

Qeyd edək ki, iyunun 13-də İsrailin İrana qarşı başlatdığı irimiqyaslı hücumlarda nüvə obyektləri və ordu rəhbərliyi hədəf alınıb. Hücum nəticəsində İranın Baş Qərargah rəisi və İnqilab Keşikçiləri Korpusunun komandanı da daxil olmaqla, yüksək səviyyəli hərbçilər və 9 nüvə alimi həlak olub. Ümumilikdə 224 mülki şəxsin həyatını itirdiyi bildirilir.

İranın cavab hücumlarında isə İsraildə 24 nəfər ölüb, 500-dən çox insan yaralanıb. Başda Türkiyə olmaqla bir sıra ölkələr İsrailin hərbi əməliyyatlarını kəskin şəkildə qınayıb.