Bakı, AzerVoice:
Türkiyəyə F-16 satışını dəstəkləməyə davam edirik.
AzerVoice xəbər verir ki, bu barədə Ağ Ev Milli Təhlükəsizlik Şurasının Strateji Kommunikasiyalar üzrə Koordinatoru Con Kirbi gündəlik brifinqdə deyib.
Onun sözlərinə görə, Bayden administrasiyası vəzifəyə başladığı gündən bu mövzu ilə bağlı eyni mövqedədir.
Ağ Evin nümayəndəsi F-16 satışına dair Konqresə rəsmi bildirişin nə vaxt veriləcəyi ilə bağlı dəqiq bir tarix açıqlamayıb.
Qeyd edək ki, 2021-ci ilin oktyabrında Türkiyə ABŞ-yə 40 ədəd F-16 "Block 70" döyüş təyyarəsi və 79 modernizasiya dəstinin satın alınması üçün müraciət edib. ABŞ administrasiyası indiyə qədər verdiyi açıqlamalarda F-16-ların Türkiyəyə satışını dəstəklədiyini bildirsə də, Konqresə nə vaxt rəsmi bildiriş verəcəyi ilə bağlı dəqiq açıqlama verməyib.
