BAKI, VOA, Orxan Qədirzadə

İsrail Knessetinin keçmiş sədri Abraham Burq amerikalı jurnalist Taker Karlsona verdiyi müsahibədə radikal yəhudi qruplarının Məscidül-Əqsa və Qübbətüs-Səhranı məhv etmək üçün həyata keçirdiyi gizli planların üstünü açıb. Burq 1967-ci ildən bu yana məscidin yerində "Məbəd" inşa etmək istəyən qruplar tərəfindən ən azı 5 ciddi partlayış cəhdinin edildiyini təsdiqləyib.

VOA xəbər verir ki, Burq bu rəqəmin daha çox ola biləcəyindən narahatlığını ifadə edərək, məsələnin sadəcə kütləvi dəstək deyil, bu işə canını qoymağa hazır olan fanatik qrupların qərarlılığı olduğunu vurğulayıb. Jurnalist Taker Karlson bu planların birbaşa "məhv etmə və partlatma sui-qəsdi" olub-olmadığını soruşub, Burq isə buna "bəli" cavabını verib.

Məscidül-Əqsa ətrafındakı gərginlik həm də 28 fevralda ABŞ və İsrailin İrana qarşı başlatdığı hərbi əməliyyatlarla əlaqələndirilir. Artıq 25 gündür ki, İsrail hakimiyyəti "təhlükəsizlik tədbirləri" və "kütləvi toplaşma qadağası" bəhanəsi ilə məscidi tamamilə bağlayıb, müsəlmanların orada namaz qılmasını qadağan edib.

İsrailin daxili təhlükəsizlik naziri İtamar Ben-Qvir və sağçı siyasətçilər sosial media üzərindən Məscidül-Əqsa ilə bağlı təhrikedici paylaşımları artırıblar.

İtamar Ben-Qvir fələstinlilərin küçələrdə namaz qılmasının qarşısının güclə alınmasını nümayiş etdirən videolar paylaşaraq polis rəhbərliyinin "sərtliyini" tərifləyib.

Yinon Maqal İran raketinin qəlpələri Qüdsə düşdükdən sonra məscidin yerini göstərərək, növbəti dəfə birbaşa məscidin hədəf alınmasını (atəşin koordinatlarını dəyişməyi) təhrik edib.

Muşe Feyqlin məscidin bağlı qalmasını "güclü regional dövlət" olmağın əlaməti kimi qiymətləndirib.

Fələstinli fəallar və beynəlxalq müşahidəçilər xəbərdarlıq edirlər ki, məscidin bağlanması və rəqəmsal təhrik prosesi ərazidə "yeni reallıq" yaratmaq məqsədi daşıyır. Xüsusilə radikal məskunlaşanların məscidin daxilində "tövrat ayinləri" icra etmək və "qurban kəsmək" çağırışları vəziyyəti partlayış həddinə çatdırıb. Regionda davam edən İran-İsrail müharibəsi fonunda müqəddəs məkanın statusunun dəyişdirilməsi cəhdləri bütün İslam dünyasında ciddi etirazla qarşılanır.