Close Menu
    Suriya

    Suriya qlobal ödəniş sisteminə qayıtdı – əş-Şaraadan simvolik addım

    Suriya qlobal ödəniş sisteminə qayıtdı – əş-Şaraadan simvolik addım

    BAKI,VOA, Fərid Mikayılov

    Suriya Prezidenti Əhməd əş-Şaraa Dəməşqdə restoranda hesabı “Visa” kartı ilə ödəyərək ölkədə beynəlxalq kart sisteminin fəaliyyətinin bərpa olunduğunu simvolik şəkildə nümayiş etdirib. Hadisə uzun illər beynəlxalq sanksiyalar altında qalan Suriyanın qlobal maliyyə sisteminə yenidən inteqrasiyası istiqamətində mühüm addım kimi təqdim olunur.

    VOA xəbər verir ki, Suriya televiziyasının yayımladığı görüntülərdə Prezident Əhməd əş-Şaraanın qədim Dəməşq ərazisində yerləşən restoranda hesabı beynəlxalq “Visa” kartı vasitəsilə ödədiyi əks olunub. Ödəniş zamanı onu Suriya Mərkəzi Bankının sədri Səfvət Raslan müşayiət edib.

    Əməliyyat Suriyanın qlobal ödəniş şəbəkələri ilə əlaqələrinin bərpasında mühüm mərhələ kimi qiymətləndirilib.

    “Visa” şirkəti də əməliyyatla bağlı açıqlama verərək Suriya Mərkəzi Bankı, “Fransabank” və “Paymera” ilə əməkdaşlıq çərçivəsində ölkədə canlı beynəlxalq kart əməliyyatının uğurla sınaqdan keçirildiyini təsdiqləyib.

    Şirkətin məlumatına görə, beynəlxalq kart sisteminin fəaliyyətə başlaması Suriyaya səfər edən xarici vətəndaşların ödəniş imkanlarını asanlaşdırmaqla yanaşı, ölkənin qlobal rəqəmsal iqtisadiyyata qoşulmasını da sürətləndirə bilər.

    Sanksiyalardan sonra iqtisadiyyatda yeni mərhələ

    Maliyyə sistemindəki yenilik ABŞ Maliyyə Nazirliyinin Suriyanı 1979-cu ildən yer aldığı “terrorizmi dəstəkləyən dövlətlər” siyahısından çıxardığını açıqlamasından dərhal sonraya təsadüf edib.

    Bu qərar Suriyaya qarşı sanksiyaların yumşaldılması istiqamətində atılan addımlardan biri kimi təqdim olunur və ölkə iqtisadiyyatının beynəlxalq sistemə inteqrasiyası üçün yeni imkanlar yaradır.

    Əhməd əş-Şaraa çərşənbə günü keçirilən 63-cü Dəməşq Beynəlxalq Sərgisinin açılışında çıxışı zamanı sanksiyaların aradan qaldırılmasından sonra Suriyanın genişmiqyaslı yenidənqurma və inkişaf mərhələsinə qədəm qoyduğunu bildirib.

    Suriya Prezidenti ölkəsinin keçmişdə olduğu kimi Şərqlə Qərb arasında ticarət dəhlizi və körpü rolunu bərpa etməsini, eyni zamanda regional iqtisadi mərkəzə çevrilməsini qarşıya məqsəd qoyduqlarını vurğulayıb.

    Beləliklə, Dəməşqdə Prezidentin “Visa” kartı ilə həyata keçirdiyi simvolik ödəniş yalnız texniki yenilik deyil, Suriyanın uzunmüddətli maliyyə təcridindən çıxaraq beynəlxalq iqtisadi sistemlə əlaqələrini bərpa etmək istiqamətində atdığı addım kimi təqdim edilir.

    Oxşar Xəbərər

    © 2026 Azervoice.