BAKI, AzerVoice, Nailə Babazadə
Səudiyyə Ərəbistanının rəhbərliyi altında Körfəz ölkələri ABŞ Prezidenti Donald Tramp administrasiyasını İrana qarşı mümkün hərbi müdaxilədən çəkindirməyə çalışır.
AzerVoice xəbər verir ki, "Wall Street Journal" (WSJ) qəzetinin anonim mənbələrə istinadən yaydığı məlumata görə, Səudiyyə Ərəbistanı, Oman və Qətər rəsmiləri Vaşinqtonu xəbərdar ediblər. Onlar İrana qarşı hərbi addımın neft bazarlarını sarsıdacağını və nəticədə ABŞ iqtisadiyyatına ciddi ziyan vuracağını bildiriblər. Körfəz ölkələri mümkün hücumların Hörmüz boğazından keçən neft tankerlərinin hərəkətini dayandırmasından və regionda uzunmüddətli qeyri-sabitlik yaranmasından narahatdırlar.
Səudiyyə Ərəbistanı rəsmiləri Tehrana zəmanət veriblər ki, hər hansı münaqişədə iştirak etməyəcək və ABŞ-ın İrana zərbə endirmək üçün krallığın hava məkanından istifadə etməsinə icazə verməyəcəklər. Ağ Ev rəsmiləri isə Donald Trampın hələlik yekun qərar vermədiyini, lakin masada hərbi obyektlərə zərbə, kiberhücumlar, yeni sanksiyalar və rejim əleyhinə sosial media kampaniyalarına dəstək kimi variantların olduğunu bildiriblər.
Xatırladaq ki, İranda 28 dekabr 2025-ci ildə iqtisadi böhran və valyutanın dəyər itirməsi səbəbindən başlayan etirazlar genişlənərək davam edir. İran İnsan Haqları Aktivistləri Xəbər Agentliyinin (HRANA) 14 yanvar tarixli hesabatına görə, nümayişlərdə həlak olanların sayı 2550-yə yüksəlib. Onların 147-si təhlükəsizlik əməkdaşı, 2403-ü isə nümayişçidir. Ölkə daxilində yanvarın 9-dan etibarən internetə çıxış tamamilə kəsilib.