BAKI, AzerVoice, Nailə Babazadə
Birləşmiş Millətlər Təşkilatının (BMT) Qadınlar üzrə Agentliyinin (UN Women) Cenevrə Ofisinin direktoru Sofiya Kaltorp Qəzzadakı humanitar vəziyyətlə bağlı ciddi xəbərdarlıq edib. O, bölgədə bir milyondan çox qadın və qız uşağının ərzaq yardımına, 250 mininin isə təcili qida dəstəyinə ehtiyacı olduğunu bildirib.
AzerVoice xəbər verir ki, Cenevrədə BMT-nin həftəlik mətbuat konfransında çıxış edən Kaltorp, son iki ildə Qəzzada hər saatda orta hesabla iki qadın və ya qız uşağının həyatını itirdiyini xatırladaraq, bunun münaqişənin miqyasını aydın şəkildə göstərdiyini qeyd edib.
“Qəzzadakı qadınlar və qız uşaqları üçün ehtiyaclar heç vaxt bu qədər böyük olmamışdı. Hazırda 1 milyondan artıq qadın və qız uşaq yardım gözləyir,” – deyə Kaltorp bildirib.
Ateşkəs fürsət kimi dəyərləndirilməlidir
BMT rəsmisi, Qəzzada başlayan atəşkəs mərhələsinin həm yardımların sürətli çatdırılması, həm də qıtlığın qarşısının alınması üçün mühüm fürsət olduğunu vurğulayıb. Onun sözlərinə görə, bölgədəki qadınların əksəriyyəti İsrailin hücumları nəticəsində ən azı dörd dəfə məcburi köçkün halına düşüb.
“Bu atəşkəs qadınların təhlükəsiz bir yer tapmaları və həyatlarını yenidən qurmaq üçün ilk real imkandır. Hazırda Qəzzada çox sayda qadın hələ də sığınacaqdan məhrumdur. Hər 7 ailədən biri artıq qadın tərəfindən idarə olunur,” – deyə o əlavə edib.
Sofiya Kaltorp, qadınların uşaqlarını doyurmaq, tibbi xidmətlərə çıxış əldə etmək və itirilmiş dolanışıq imkanlarını bərpa etmək üçün birbaşa humanitar yardım almasının həyati əhəmiyyət daşıdığını bildirib.
Xatırladaq ki, ABŞ-ın sabiq prezidenti Donald Trump 9 oktyabrda verdiyi açıqlamada, Misirdə davam edən danışıqlar çərçivəsində İsrail və HƏMAS-ın Qəzzada atəşkəs planının ilkin mərhələsini təsdiqlədiyini bəyan etmişdi. Bu razılaşma 10 oktyabr tarixində İsrail hökumətinin təsdiqi ilə qüvvəyə minib.
İsrailin son iki il ərzində Qəzzaya qarşı həyata keçirdiyi hərbi əməliyyatlar nəticəsində 67 min 967 fələstinli həyatını itirib, 170 min 179 nəfər yaralanıb.