BAKI, AzerVoice

İsrail ordusunun sözçüsü, briqada generalı İvi Dibrin (Evy Dibrin) cümə axşamı açıqlamasında bildirib ki, ordunun hazırda Qəzza şəhərinin təxminən 40 faizinə nəzarət edir.

AzerVoice xəbər verir ki, O, yaxın günlərdə əməliyyatların daha da genişlənəcəyini və intensivləşəcəyini vurğulayıb. Məqsəd şəhərə tam nəzarəti ələ almaq və HƏMAS-ı hərbi cəhətdən zəiflətməkdir.

Ötən həftə İsrail Qəzza şəhərini rəsmi olaraq “döyüş bölgəsi” elan edib. Şəhərin bəzi hissələri “qırmızı zona” kimi tanınıb və yerli əhalidən təxliyə olunmaları tələb edilib. İsrail mətbuatının yazdığına görə, 200 minə yaxın fələstinlinin evlərini tərk etməkdən imtina edəcəyi gözlənilir.

Hazırda 70-80 min nəfərin şəhəri tərk etdiyi, onların böyük hissəsinin son 72 saat ərzində qaçdığı bildirilir. Lakin bu rəqəm Qəzza şəhərinin ümumi 1 milyonluq əhalisinin kiçik bir hissəsini təşkil edir.

Ordunun sözçüsü, Baş Qərargah rəisi general Eyal Zamirin əməliyyata qarşı olduğu barədə yayılan xəbərləri rədd edib. Onun sözlərinə görə, Zamir Qəzza şəhərinə nəzarət planını tam dəstəkləyir. O, əgər müharibədən sonrakı mərhələ üçün alternativ siyasi çərçivə ortaya çıxmasa, İsrailin Qəzzada hərbi administrasiya quracağını da bəyan edib.

Əhali və humanitar vəziyyət

Ordu dəfələrlə əhalini cənuba köçməyə çağırsa da, Qəzza sakinləri təhlükəsiz yerin olmadığını bildirirlər. Yaşlılar, xəstələr və qidalanma problemi yaşayanlar üçün təxliyə xüsusilə çətin görünür. Beynəlxalq Qızıl Xaç Komitəsi şəhərin tamamilə boşaldılmasının “imkansız” olduğunu vurğulayıb.

İsrail mediası həmçinin ordunun artilleriya atəşindən istifadə etməklə mülki əhalini qorxudaraq şəhəri tərk etməyə məcbur etdiyini iddia edir. Ordu isə bu ittihamlarla bağlı şərh verməyib.