BAKI, AzerVoice, Səməd Əyyubov

İsrailin “Mossad” kəşfiyyat xidmətinin rəhbəri David Barnea Qətərdə Qəzzada atəşkəs danışıqlarını bərpa etmək məqsədilə səfərdədir.

AzerVoice xəbər verir ki, eyni zamanda, İsrailin maliyyə naziri, radikal sağçı siyasətçi Betsalel Smotriç, uzun müddətdir təxirə salınan və icrası halında İordan çayının qərb sahilini iki hissəyə böləcək, onu Şərqi Qüdsdən ayıracaq məskunlaşma layihəsinə start veriləcəyini açıqlayıb. Nazirliyin bəyanatında bu addımın Fələstin dövlətinin yaradılması ideyasını ortadan qaldıracağı vurğulanıb.

Qeyd edək ki, Baş nazir Binyamin Netanyahunun “E1” adlanan və illərdir dondurulmuş bu layihənin yenidən gündəmə gətirilməsinə dəstək verib-vermədiyi hələlik məlum deyil. Fələstin tərəfi və beynəlxalq ictimaiyyət planın Qərb sahilini iki yerə böləcəyini bildirərək ona qarşı çıxıb. İsrail isə 2012-ci ildən etibarən ABŞ, Avropa ölkələri və digər beynəlxalq tərəfdaşların etirazları səbəbindən bu tikinti işlərini dayandırmışdı.

Bununla yanaşı, İsrail Qərb sahilində məskunlaşmaları genişləndirmək niyyətini də bəyan edib. Hüquq müdafiə təşkilatları isə bunun gələcəkdə coğrafi baxımdan vahid və yaşayışa yararlı Fələstin dövlətinin qurulmasına ciddi maneə yaradacağı barədə xəbərdarlıq ediblər.