BAKI, AzerVoice
Qəzzanın cənubundakı Rəfah şəhərində bu gün yardım paylanması zamanı xaos yaşanıb. ABŞ tərəfindən maliyyələşdirilən “Humanitar Yardım Fondu”nun bildirdiyinə görə, yardım almaq istəyənlərin sayı kritik həddə çatdığı üçün onların əməkdaşları geri çəkilməyə məcbur qalıblar. Fond hadisələrin nəzarətdən çıxmaması üçün müvəqqəti olaraq yardım bölgüsünü dayandırdığını açıqlayıb.
Yardım bölgüsü nəzarətdən çıxdı
Qəzza sakinləri, xüsusilə HƏMAS-ın tətbiq etdiyi blokada səbəbilə yardım mərkəzinə çatmaqda saatlarla çətinlik yaşayıb. Bu müddətdə ABŞ-ın dəstəklədiyi fond artıq 8000 qida qutusu paylayaraq 462 min porsiya yemək təmin etdiyini bildirib.
Amerikalı mühafizəçilər geri çəkildi, İsrail ordusu müdaxilə etdi
Qəzzanın cənubundakı Rəfah şəhərində İsrail ordusu tərəfindən qurulan yardım paylama məntəqəsinə minlərlə insanın axın etməsi nəticəsində iğtişaşlar baş verib. ABŞ-a bağlı xüsusi təhlükəsizlik şirkətinin əsgərləri nəzarəti itirdikdən sonra İsrail ordusu onların təxliyəsinə müdaxilə edib.
Yardım məntəqəsi yaxınlığında israilli əsgərlərin xəbərdarlıq atəşi açdığını və tank mərmisinin səsinin eşidildiyini bildirib.
Qəzzadakı Hökumət Media İdarəsi məsələ ilə bağlı açıqlamasında, İsrail ordusunun yardım bölgüsündə “uğursuzluğa düçar olduğunu” və bunun “insanları aclıqla məhv etməyə yönəlmiş” siyasətin nəticəsi olduğunu vurğulayıb. Açıqlamada qeyd olunur ki, aclıq içində yaşayan minlərlə insan yardım məntəqəsinə axın edib və nəticədə israilli əsgərlərin müdaxiləsi ilə qarşılaşıblar. Hadisə zamanı yaralananların olduğu bildirilib.
Qurum İsraili "yardımı silaha və siyasi təzyiq vasitəsinə çevirməkdə" ittiham edib və BMT ilə Təhlükəsizlik Şurasını "bu cinayətə dərhal son qoymaq və keçid məntəqələrini qeyd-şərtsiz açmaq" üçün çağırıb.
İsrail: “HƏMAS yardımı ələ keçirir”
İsrail isə cavabında HƏMAS-ı yardımları ələ keçirməkdə ittiham edərək yeni yardım mexanizmini məhz bu səbəbdən tətbiq etdiyini açıqlayıb. Yeni sistemin birinci günü olan bu gün yaşanan hadisələr isə sistemin davamlılığına dair ciddi suallar yaradıb.
3 nəfər həyatını itirib
Fələstin telekanalı “Əl-Əqsa” yardım məntəqəsi yaxınlığında İsrail atəşi nəticəsində 3 nəfərin öldüyünü bildirib. İsrail ordusu isə yalnız xəbərdarlıq atəşi açıldığını və vəziyyətin nəzarət altına alındığını bildirib. Yardımların planlaşdırıldığı kimi davam etdiriləcəyi vurğulanıb
