BAKI,VOA, Fərid Mikayılov

İranın xarici işlər nazirinin hüquq və beynəlxalq məsələlər üzrə müavini Kazım Qəribabadi ölkəsinə qarşı yönəlmiş hər bir təcavüz aktına mütləq şəkildə qarşılıq veriləcəyini bəyan edib.

VOA xəbər verir ki, o, heç bir düşmən addımının cəzasız qalmayacağını qətiyyətlə vurğulayıb.

Rəsmilərin verdiyi məlumata görə, Kazım Qəribabadi bu barədə öz rəsmi X sosial şəbəkə hesabında paylaşım edib. Regionda davam edən gərginlik fonunda Tehranın yüksək hazırlıq və ayıq-sayıqlıq vəziyyətində olduğunu göstərən nazir müavini, ölkəyə qarşı istənilən hərbi təcavüzə dərhal "əzici cavab" strategiyasının davam etdirilməsinin vacibliyini qeyd edib.

Qəribabadi həmçinin əlavə edib ki, İslam İnqilabının Ali Liderinə, hərbi və ya mülki rəsmilərə qarşı hər hansı mümkün sui-qəsd cəhdi baş verəcəyi təqdirdə sistem tərəfindən qətiyyətli və qarşı tərəfdə ciddi peşmançılıq doğuracaq bir cavabın verilməsini təmin edən operativ qətnamə qəbul edilməlidir. O, bu mühüm qətnamənin Ali Milli Təhlükəsizlik Şurası (AMTŞ) və ya ölkə Parlamenti tərəfindən təcili olaraq təsdiqlənməsinin vacibliyini diqqətə çatdırıb.

Yüksək rütbəli diplomat İrana qarşı yönələn heç bir düşmən fəaliyyətinin cavabsız buraxılmayacağını bir daha bəyan edib.