BAKI,VOA,Yusif Şərifzadə

İran Hörmüz boğazından hərəkət edən gəmiləri yalnız rəsmi təsdiqlənmiş marşrutlardan istifadə etməyə çağırıb. Tehran bildirib ki, müəyyən olunmuş qaydalara əməl olunmaması sərt cavabla qarşılanacaq.

VOA xəbər verir ki, İranın Xatəm əl-Ənbiya Mərkəzi Qərargahı yaydığı bəyanatda Hörmüz boğazında hərəkət edən bütün gəmilərin İran tərəfindən müəyyən edilmiş marşrutlara və gəmiçilik qaydalarına riayət etməli olduğunu bildirib. Bəyanata əsasən, marşrutdan kənara çıxan və ya müəyyən olunmuş qaydalara əməl etməyən gəmilərə qarşı silahlı qüvvələr tərəfindən dərhal və qətiyyətli tədbirlər görüləcək.

Xəbərdarlıq İran dövlət televiziyasının Hörmüz boğazında bir gəminin İranın təsdiqləmədiyi marşrutdan istifadə etdiyi üçün dayazlığa oturması barədə məlumat yaymasından sonra səsləndirilib.

İran rəsmiləri Hörmüz boğazında gəmi hərəkətinin təhlükəsizliyinin təmin olunmasının vacibliyini vurğulayırlar. Boğaz dünya üzrə neft və mayeləşdirilmiş təbii qaz daşımalarının əsas keçid yollarından biri hesab olunur.