BAKI,VOA

İran Xarici İşlər Nazirliyinin rəsmi sözçüsü bu gün keçirdiyi mətbuat konfransında ABŞ ilə aparılan danışıqlar prosesi və ölkə limanlarının mühasirəsi barədə sərt bəyanatlarla çıxış edib.

VOA xəbər verir ki, nazirlik rəsmisi Tehranın danışıqlarda ciddi və xoş məramla iştirak etdiyini lakin Vaşinqtonun bu müddətdə yalnız etinasızlıq və bəd niyyət nümayiş etdirdiyini vurğulayıb.

Bəyanatda xüsusi diqqət çəkən məqam İran limanlarına tətbiq edilən dəniz blokadasının hələ də qüvvədə qalması olub. İran tərəfi bu vəziyyəti beynəlxalq hüquqa zidd və açıq bir təcavüzkar hərəkət kimi xarakterizə edib. Sözçü bildirib ki ABŞ tərəfindən tətbiq edilən bu hərbi və iqtisadi təzyiq rıçaqları dialoq mühitinə ciddi zərər vurur.

İran Xarici İşlər Nazirliyinin bu çıxışı diplomatik təmaslara cəhd edilsə də tərəflər arasındakı inamsızlığın pik həddə olduğunu göstərir. Xüsusilə dəniz blokadasının yaratdığı iqtisadi sıxıntılar Tehranın danışıqlarda real irəliləyiş əldə etməsinə mane olan ən böyük əngəl kimi qiymətləndirilir. Müşahidəçilər hesab edirlər ki ABŞ-ın təzyiq siyasəti davam etdiyi müddətcə tərəflərin razılığa gəlməsi çətin görünür.