BAKI,VOA, Fərid Mikayılov

İran İsrail və ABŞ-a məxsus hərbi hədəflərə qarşı yeni hücumlar həyata keçirildiyini açıqlayıb.

VOA xəbər verir ki, İran İnqilab Keşikçiləri Korpusu bildirib ki, “Sadiq Vəd 4” əməliyyatının 87-ci dalğası çərçivəsində İsrailin komanda mərkəzləri və bölgədə yerləşən 5 ABŞ hərbi bazası raketlər və pilotsuz uçuş aparatları ilə hədəfə alınıb.

Açıqlamada qeyd olunub ki, hücumlar zamanı komanda-idarəetmə mərkəzləri, pilotsuz aparat anqarları, silah anbarları və hərbi obyektlər vurulub. Bildirilir ki, əməliyyatlarda “İmad”, “Qiyam” və “Xürrəmşəhr-4” tipli ballistik raketlərdən istifadə edilib.

Məlumata görə, hücumlar Küveyt, İraq və Səudiyyə Ərəbistanında yerləşən ABŞ hərbi obyektlərini də əhatə edib və zərbələr gecə saatlarından etibarən davam edir.

Eyni zamanda, İran tərəfi Küveytdə yerləşən duzsuzlaşdırma (su təmizləmə) obyektlərinə edilən hücumların İsrail tərəfindən həyata keçirildiyini iddia edərək bunu pisləyib.

İran bəyan edib ki, bölgədəki ABŞ hərbi bazaları və İsrailə məxsus hərbi və təhlükəsizlik obyektləri onun əsas hədəfləri olaraq qalır.