BAKI,VOA Orxan Qədirzadə

Türkiyədə terror təşkilatı İŞİD-ə qarşı eyni vaxtda 30 vilayətdə keçirilən genişmiqyaslı əməliyyatlar zamanı 119 şübhəli saxlanılıb.

Türkiyənin Daxili İşlər Nazirliyinin yaydığı məlumata görə, əməliyyatlar Jandarma Baş Komandanlığının Terrorla Mübarizə İdarəsinin, Respublika Baş Prokurorluqlarının koordinasiyası və vilayət jandarma komandanlıqlarının iştirakı ilə həyata keçirilib.

Araşdırmalar zamanı saxlanılan şəxslərin terror təşkilatı ilə əlaqəli fəaliyyət göstərdikləri müəyyən edilib.

İstintaq materiallarına əsasən, şübhəlilərin sosial media hesabları vasitəsilə İŞİD terror təşkilatının təbliğatını apardıqları, təşkilatın fəal üzvləri olduqları, həmçinin terror təşkilatı ilə əlaqəli şəxslər və qondarma yardım qurumları vasitəsilə İŞİD-ə maliyyə dəstəyi göstərdikləri müəyyən olunub.

Respublika Baş Prokurorluqları saxlanılan 119 nəfər barəsində müvafiq hüquqi araşdırmaların başlandığını açıqlayıb.

Türkiyənin Daxili İşlər Nazirliyi bəyan edib ki, təhlükəsizlik qüvvələri ilə birlikdə İŞİD terror təşkilatının fəaliyyətinə və maliyyə şəbəkələrinə qarşı əməliyyatlar qətiyyətlə davam etdiriləcək.

Nazirlik əməliyyatın uğurla həyata keçirilməsində iştirak edən Jandarma Baş Komandanlığının Terrorla Mübarizə İdarəsinin əməkdaşlarını, vilayət jandarma komandanlıqlarını və Respublika Baş Prokurorluqlarını təbrik edib.