BAKI,VOA, Fərid Mikayılov

"Apple" bazar dəyərinə görə yenidən dünyanın ən bahalı şirkəti adına sahib çıxaraq "Nvidia"nı geridə qoyub.

VOA xəbər verir ki, şirkətin səhmlərinin birjada cüzi bahalaşmasından sonra "Apple"ın bazar kapitallaşması təxminən 4,9 trilyon dollara çatıb. "Nvidia"nın bazar dəyəri isə 4,8 trilyon dollar səviyyəsində qiymətləndirilir.

Məlumata görə, texnologiya sektorunda investorlar son aylarda süni intellekt və yarımkeçirici istehsalçılarına yönəlmiş rekord artımdan sonra investisiya portfellərini yenidən formalaşdırmağa başlayıblar. Bir çox investor bu sahədəki səhmləri sataraq yenidən "Apple"a üstünlük verir.

Bundan əlavə, HSBC bankının analitikləri "Apple" səhmlərinin gələcəkdə daha da bahalaşacağını proqnozlaşdıraraq müştərilərinə onları almağı tövsiyə ediblər. Mütəxəssislər artımın əsas səbəbləri kimi yeni süni intellekt funksiyalarını, yenilənmiş "Siri"ni, "Apple Intelligence" platformasının yeni bazarlarda istifadəyə verilməsini və gələcək məhsul xəttini, o cümlədən qatlana bilən "iPhone" modelinin təqdimatını göstərirlər.

Şirkətlərin növbəti rüblük maliyyə hesabatlarının səhmlərin gələcək dinamikasına ciddi təsir göstərəcəyi bildirilir. "Apple" maliyyə nəticələrini iyulun 30-da, "Nvidia" isə avqustun 26-da açıqlayacaq.

İnvestorlar xüsusilə "Apple"ın xidmətlər sektorunun nəticələrini, Çin bazarındakı vəziyyəti və "iPhone 18" ilə bağlı mümkün yenilikləri diqqətlə izləyirlər. Bu hesabatların yaxın həftələrdə dünyanın ən bahalı şirkəti statusunu hansı şirkətin qoruyacağını müəyyənləşdirəcəyi gözlənilir.

Qeyd edək ki, "Apple" daha əvvəl süni intellektin hazırlanması zamanı kommersiya sirrindən qanunsuz istifadə edildiyini iddia edərək "OpenAI" şirkətinə qarşı məhkəmə iddiası qaldırıb.