BAKI,VOA, Nailə Babazadə

İsrailin Baş naziri Benyamin Netanyahunun İranın hərbi gücünün "məhv edildiyini" bildirməsindən sonra cümə günü Tehrana yeni hava zərbələri endirilib. Fevralın 28-dən bəri demək olar ki, hər gün bombardman edilən paytaxtda bu dəfə "terror rejiminin infrastrukturu" hədəf alınıb.

VOA xəbər verir ki, Netanyahu keçirdiyi mətbuat konfransında müharibənin dördüncü həftəsinə doğru irəlilədiyini və İranın uranı zənginləşdirmə və ya ballistik raket istehsal etmə imkanlarının sıradan çıxarıldığını vurğulayıb. "Biz qalib gəlirik, İran isə çökür", – deyə o əlavə edib. Lakin İran İsrailə və Körfəz ölkələrinə, xüsusən də neft-qaz obyektlərinə cavab zərbələrini davam etdirir ki, bu da qlobal enerji böhranı narahatlığını artırır.

Ramazan bayramı və Novruz şənliklərinin keçirildiyi bir vaxtda Səudiyyə Ərəbistanı, BƏƏ və Küveyt də yeni hücumlar barədə məlumat verib. Müharibə Livan istiqamətində də genişlənib; Livan Səhiyyə Nazirliyi İsrailin zərbələri nəticəsində ölənlərin sayının 1000-i keçdiyini açıqlayıb. Livan Prezidenti Cozef Aun atəşkəs və danışıqlar üçün beynəlxalq ictimaiyyətə müraciət edib.

Netanyahu həmçinin İran rəhbərliyində "çatların" olduğunu və müharibənin gözləniləndən daha tez bitə biləcəyini iddia edib. O, ölkənin yeni Ali Rəhbəri Müctəba Xameneinin (müharibənin ilk günü öldürülən Əli Xameneyinin oğlu) hələ də ictimaiyyət qarşısına çıxmadığına diqqət çəkib. ABŞ Prezidenti Donald Tramp isə İsrailin addımları ilə koordinasiyalı hərəkət etdiklərini, lakin hazırda İrana quru qoşunları göndərmək planlarının olmadığını bildirib.