BAKI,VOA Orxan Qədirzadə

Əlcəzairdə meşə yanğınları nəticəsində azı 12 nəfər həyatını itirib, alovun yaşayış məntəqələrinə yaxınlaşması səbəbilə ölkənin şərqində təxliyə tədbirləri həyata keçirilir.

Əlcəzair Daxili İşlər naziri Səid Sayudun sözlərinə görə, ölənlərdən 5-i Jijel, 4-ü Bejaia, 3-ü isə Tizi Uzu vilayətlərində qeydə alınıb.

Mülki Müdafiə Xidmətinin məlumatına əsasən, ölkənin şərqində 16 vilayəti əhatə edən 159 meşə və bitki örtüyü yanğını qeydə alınıb. Onlardan 90-ı söndürülüb, 69 yanğının qarşısının alınması istiqamətində işlər davam etdirilir.

Jijel vilayətində alov yaşayış ərazilərinə çatdığı üçün sakinlər bəzi yaşayış məntəqələrindən təhlükəsiz ərazilərə təxliyə edilib. Yanğınlarla mübarizədə həm hava, həm də quru qüvvələrindən istifadə olunur.

Yanğınlar ölkədə havanın kəskin istiləşdiyi bir vaxta təsadüf edib. Meteoroloqlar bəzi ərazilərdə temperaturun 49 dərəcəyədək yüksələcəyini proqnozlaşdırıblar.

Əlcəzairdə meşə yanğınları son illərdə quraqlıq və yüksək temperatur fonunda daha da intensivləşib. Mayın 1-dən iyulun 20-dək ölkədə təxminən 4 min yanğın qeydə alınıb ki, bu da ötən ilin eyni dövrü ilə müqayisədə 167 faiz çoxdur.