BAKI,AzerVoice Analitik Təhlil Mərkəzi
Hizbullahın baş katibi Naim Qasim Livan hökumətini silahların yalnız dövlətin əlində cəmləşdirilməsi qərarı ilə “İsrail layihəsinə xidmət etməkdə” ittiham edib və buna qarşı “Kərbəla savaşı” aparacağını bəyan edib. O, “Hökumət partiyanı qarşısına alarsa, Livan” xəbərdarlığını edib.
Hökumətin silah qərarı və beynəlxalq təzyiqlər
Livan Nazirlər Şurası 7 avqust 2025-ci ildə silahların yalnız dövlətin əlində olması barədə qərar qəbul edib və ordunu bu prosesi cari ay ərzində planlaşdıraraq 2025-ci ilin sonuna qədər icra etməyə tapşırıb. Qərar ABŞ təzyiqləri və İsrailin yeni hərbi əməliyyatlara başlamaq hədələri fonunda qəbul olunub. İsrailin keçmiş döyüşlərdə Hizbullaha ağır zərbələr vurduğu bildirilir.
İmam Hüseynin Ərbəin mərasimi münasibətilə Baalbek şəhərində televiziya ilə yayımlanan çıxışında Naim Qasim hökumət qərarını “təhlükəli” adlandırıb, bunun ölkəni böyük böhrana aparacağını və milli birgəyaşayış prinsiplərinə zidd olduğunu vurğulayıb.
Onun sözlərinə görə, bu addım “müqaviməti və Livanı müdafiə silahından məhrum etmək, mücahidlərin öldürülməsini və torpaqlarından çıxarılmasını asanlaşdırmaq, ABŞ-İsrail planını həyata keçirmək” deməkdir. Qasim bildirib ki, Hizbullah müqavimət silahını təhvil verməyəcək və lazım gələrsə, bu “ABŞ-İsrail layihəsinə” qarşı “Kərbəla savaşı” aparacaq.
Hizbullah lideri hökuməti “ölkədə istənilən daxili toqquşma və dağıntıya görə tam məsuliyyət daşımaqda” ittiham edib.Qasim əlavə edib ki, hökumətin vəzifəsi ölkəni sabitlik və bərpa yolu ilə aparmaqdır, onu “acgöz İsrail işğalçısına və sərhədsiz tamahı olan ABŞ-a” təslim etmək deyil.
Etirazlar və təxirə salınmış aksiyalar
O, müqavimət silahının təhvil verilməsinə qarşı küçə etirazlarının ABŞ səfirliyi qarşısına qədər çata biləcəyini deyib. Lakin Hizbullah və Əməl Hərəkatının rəhbərliyi qarşıdurmadan əvvəl dialoqa imkan vermək üçün bu addımı təxirə salıb.
Qasim hökumətə müraciət edərək, “İşğalı dayandırın, İsraili Livandan çıxarın, milli və strateji təhlükəsizlik müzakirələri zamanı bizdən bütün asanlaşdırıcı dəstəyi alın” çağırışını edib.
Məsələnin tarixi və hazırkı tələblər
Hizbullah – 1975–1990 vətəndaş müharibəsindən sonra hərbi arsenalını saxlayan yeganə fraksiya – silahlarının çıxarılmasını qəbul etmir. Təşkilat İsrailin ötən ilki müharibə zamanı ələ keçirdiyi 5 təpədən çəkilməsini, atəşkəsə baxmayaraq davam edən hava zərbələrinin dayandırılmasını, həbs edilən döyüşçülərinin azad edilməsini və dağıdılmış ərazilərin bərpasını tələb edir.
Hizbullah və digər qruplar 7 oktyabr 2023-də İsrailin Qəzza zolağında başlatdığı hərbi əməliyyatlar fonunda Livan–İsrail sərhədində döyüşlərə qoşulub. İsrail 23 sentyabr 2024-dən etibarən hava hücumlarını ölkənin böyük hissəsinə, o cümlədən Beyruta qədər genişləndirib və Cənub Livanda quru əməliyyatlarına başlayıb.
27 noyabr 2024-də Hizbullah və İsrail arasında atəşkəs qüvvəyə minsə də, rəsmi məlumatlara görə, İsrail onu 3 mindən çox dəfə pozub, nəticədə 266 nəfər ölüb, 563 nəfər yaralanıb.