BAKI,VOA,Yusif Şərifzadə
İsrail ordusu Livanın cənubunda nəzarətində saxladığını bildirdiyi ərazidə "Hizbullah" hərəkatının üzvlərinə qarşı əməliyyat keçirdiyini açıqlayıb. Hərbi qurumun məlumatına görə, hədəfə alınan şəxslər tank əleyhinə raketlər daşıyırdılar.
VOA xəbər verir ki, İsrail ordusunun yaydığı bəyanatda bir qrup şəxsin silah daşıdığı müşahidə edildikdən sonra onlara hava zərbəsi endirildiyi bildirilib. Hərbi qurum həmin şəxslərin "Hizbullah" üzvləri olduğunu iddia edib.
Açıqlamada əməliyyat nəticəsində neçə nəfərin yaralandığı və ya həlak olduğu barədə məlumat verilməyib. Hadisə ilə bağlı müstəqil mənbələrdən təsdiq əldə olunmayıb.
Son günlər İsrail ordusunun Livanın cənubuna endirdiyi hava zərbələrinin intensivliyi artıb. Hücumlar nəticəsində çoxsaylı ölən və yaralananların olduğu barədə məlumatlar yayılıb.