BAKI,VOA,Yusif Şərifzadə
Birləşmiş Ərəb Əmirlikləri dövlət neft şirkəti ADNOC ilə əlaqəli gəmiyə İran tərəfindən hücum edildiyini bildirərək hadisəni pisləyib. Hadisənin gəmi cümə günü Hörmüz boğazından keçərkən baş verdiyi açıqlanıb.
VOA xəbər verir ki, BƏƏ-nin dövlət xəbər agentliyi VAM-ın yaydığı məlumata görə, ADNOC gəmisinə hücum nəticəsində xəsarət alan olmayıb və vəziyyət nəzarət altına alınıb.
BƏƏ Xarici İşlər Nazirliyi açıqlamasında ticarət gəmilərinin hədəfə alınmasını və Hörmüz boğazından “iqtisadi təzyiq və ya şantaj” vasitəsi kimi istifadə edilməsini pisləyib.
Nazirlik bu addımları İran İslam İnqilabı Keşikçiləri Korpusunun “dəniz quldurluğu əməlləri” kimi qiymətləndirib.
BƏƏ İranı gəmilərə qarşı hücumları dayandırmağa çağırıb və Hörmüz boğazının tam və qeyd-şərtsiz şəkildə açılmasını tələb edib.
BƏƏ Xarici İşlər Nazirliyi həmçinin beynəlxalq dəniz daşımalarının təhlükəsizliyinin təmin edilməsinin vacibliyini vurğulayıb.
Bu hadisədən bir gün əvvəl, cümə axşamı axşam saatlarında Hörmüz boğazından keçən daha iki ADNOC gəmisinin də hücuma məruz qaldığı bildirilib.
Son hadisələr Hörmüz boğazında gəmiçilik təhlükəsizliyi ilə bağlı narahatlıqları daha da artırıb və enerji daşımalarının gələcəyi ilə bağlı yeni suallar yaradıb.