BAKI,AzerVoice

Türkmənistan Nazirlər Kabineti sədrinin müavini, xarici işlər naziri Rəşid Meredov ilə Əfqanıstanın xarici işlər naziri vəzifəsini icra edən Əmir Xan Muttaki arasında görüş keçirilib.

AzerVoice xəbər verir ki, görüşdə tərəflər Türkmənistan və Əfqanıstan arasında siyasi və iqtisadi əlaqələri, diplomatik münasibətlərin gücləndirilməsini, eləcə də böyük ortaq layihələri, xüsusilə Türkmənistan–Əfqanıstan–Pakistan–Hindistan (TAPI) qaz kəməri layihəsinin Əfqanıstan hissəsinin icrası məsələsini müzakirə ediblər.

Əmir Xan Muttaki iki ölkə arasında mövcud olan ikitərəfli münasibətlərin güclü təməl üzərində qurulduğunu qeyd edərək, əməkdaşlığın genişləndirilməsi və ortaq maraqların irəlilədilməsi üçün əlverişli şəraitin olduğunu vurğulayıb.

O, Əfqanıstan hökumətinin böyük ortaq iqtisadi layihələrin həyata keçirilməsində qərarlı olduğunu da bildirib.

Türkmənistan tərəfi isə TAPI layihəsinin həyata keçirilməsi istiqamətində müsbət addımların atıldığını qeyd edib və dəmir yolu, ticarət və tranzit sahələrində əməkdaşlıq imkanlarına toxunub.

Tərəflər, TAPI qaz kəmərinin tikintisinin sürətləndirilməsi, dəmir yolu sisteminin inkişafı, nəqliyyat infrastrukturunun təkmilləşdirilməsi, enerji təchizatı və iqtisadi əməkdaşlığın genişləndirilməsi istiqamətində görüş və məsləhətləşmələrin davam etdirilməsi barədə razılığa gəliblər.