Türkiyə Prezidenti Rəcəb Tayyib Ərdoğan Misirin Türkiyə, Səudiyyə Ərəbistanı və Pakistan arasında imzalanan qarşılıqlı müdafiə sazişinə qoşula biləcəyini bildirib.

Ərdoğan “Əl-Cəzirə”yə müsahibəsində Məkkə Birgə Müdafiə Sazişinin yeni üzvlərin qoşulmasına açıq olduğunu və Qahirənin mümkün iştirakının nəzərdən keçirilən variantlardan biri olduğunu deyib.

Saziş ötən həftə Məkkədə Türkiyə Prezidenti Ərdoğan, Səudiyyə Ərəbistanının vəliəhdi Məhəmməd bin Salman və Pakistanın Baş naziri Şahbaz Şərif tərəfindən imzalanıb. Razılaşmaya əsasən, tərəflərdən birinə silahlı hücum digər tərəflərə qarşı hücum kimi qiymətləndiriləcək və xarici təhlükə zamanı koordinasiyalı cavab veriləcək.

Ərdoğan müsahibəsində həmçinin Hörmüz boğazının açılmasının Ankara üçün prioritet olduğunu, Qəzza, Livan və Suriyadakı vəziyyətin, eləcə də Sudan və Liviyadakı proseslərin Türkiyə üçün əhəmiyyət daşıdığını bildirib.

Türkiyə lideri ölkəsinin Avropa İttifaqına üzvlüyünün artıq əsas prioritet olmadığını da deyib. O, həmçinin ABŞ-ın F-35 proqramına qayıtmaq məsələsində Vaşinqtonun verdiyi vədlərə əməl etməsini gözlədiklərini bildirib.