BAKI,VOA, Fərid Mikayılov
Türkiyə Milli Müdafiə Nazirliyi Türkiyə, Pakistan və Səudiyyə Ərəbistanı arasında imzalanan Məkkə Birgə Müdafiə Razılaşmasının hərbi əməkdaşlığın mərhələli şəkildə inkişaf etdirilməsini nəzərdə tutduğunu açıqlayıb.
VOA xəbər verir ki, bunu Türkiyə Milli Müdafiə Nazirliyinin sözçüsü Zəki Aktürk bildirib. Onun sözlərinə görə, avqustun 7-də imzalanan razılaşma üç ölkə arasında mövcud dostluq və qardaşlıq münasibətlərinin müdafiə və təhlükəsizlik sahəsində daha institusional və davamlı əməkdaşlığa çevrilməsini məqsəd qoyur.
Aktürk bildirib ki, razılaşmanın əsas məqsədi regional təhlükəsizlik və sabitliyə töhfə vermək, üç ölkə arasında hərbi əməkdaşlığı inkişaf etdirmək və mümkün böhranlar zamanı birgə fəaliyyət imkanlarını gücləndirməkdir.
Məkkə Birgə Müdafiə Sazişinə hansı ölkələr qatıla bilər – Prezident Ərdoğan açıqladı
Onun sözlərinə görə, sənəd müdafiə xarakteri daşıyır və heç bir ölkəni ortaq düşmən və ya qarşı tərəf kimi müəyyənləşdirmir.
Razılaşma çərçivəsində müdafiə və xarici işlər nazirlərinin, eləcə də Baş Qərargah rəisləri və silahlı qüvvələrin komandanlarının iştirakı ilə strateji siyasi və hərbi mexanizmlərin yaradılması nəzərdə tutulur.
Aktürk hərbi əməkdaşlığın mərhələli şəkildə inkişaf etdiriləcəyini bildirib. İlk mərhələdə komanda-qərargah və ərazi təlimlərindən başlanılması, daha sonrakı mərhələlərdə isə quru, dəniz, hava, hava hücumundan müdafiə və pilotsuz sistemlərin iştirakı ilə birgə təlimlərin keçirilməsi planlaşdırılır.
Təlimlər vasitəsilə mümkün böhranlardan əvvəl ehtiyac və çatışmazlıqların müəyyənləşdirilməsi, əldə olunan təcrübənin hərbi doktrina, təlim və planlaşdırma proseslərinə tətbiqi və birgə əməliyyat imkanlarının davamlı inkişaf etdirilməsi hədəflənir.
Müdafiə sənayesi əməkdaşlığı da razılaşmanın əsas istiqamətlərindən biri olacaq. Bu çərçivədə yalnız hərbi məhsul və sistemlərin alınması deyil, birgə işlənib hazırlanma və istehsal, texnologiya əməkdaşlığı, eləcə də texniki xidmət və logistika sahəsində davamlı dəstəyin təmin edilməsi planlaşdırılır.
Aktürk pilotsuz və avtonom sistemləri, elektron müharibə vasitələrini və süni intellekt əsaslı imkanları prioritet əməkdaşlıq sahələri sırasında göstərib.
Türkiyə Milli Müdafiə Nazirliyi Məkkə Birgə Müdafiə Razılaşmasının NATO-ya alternativ və ya rəqib struktur olmadığını, beynəlxalq təhlükəsizlik arxitekturasını tamamlayan və regional təhlükəsizliklə sabitliyə töhfə verən mexanizm kimi nəzərdə tutulduğunu bildirib.