Pakistanın şərqində yerləşən Taksila şəhərində bu həftə naməlum şəxslərin atəş açması nəticəsində pakistanlı "TikTok" ulduzu həyatını itirib. Bu barədə polisə təqdim olunan rəsmi şikayət ərizəsində bildirilir. 28 yaşlı Bibinin atası Fəzəl Sahibzadə şikayət ərizəsində hadisənin 14 avqust tarixində baş verdiyini qeyd edib. Onun sözlərinə görə, ictimaiyyət arasında həm də "Aişə Gilamana" kimi tanınan Bibiyə "Kaşi" ləqəbli Kaşif adlı şəxsdən zəng gəlib və o, qadından dərhal evdən bayıra çıxmasını tələb edib.

Bibi, onun 15 yaşlı bacısı Asimə və qardaşı Nemətullah avtomobillə evdən çıxıblar. Qısa müddət sonra Sahibzadə Bibinin güllələnərək öldürüldüyünü, digər qızının isə ağır yaralandığını öyrənib.

Sahibzadə Taksila rayon xəstəxanasına gələrək meyitxanada Bibinin cəsədini tanıdığını bildirib. Orada oğlu Nemətullah atasına danışıb ki, yanacaqdoldurma məntəqəsinin yaxınlığında 30-35 yaşlarında olan iki naməlum şəxs motosikletdən onların avtomobilinə atəş açıb. Güllələr Bibinin boyun nahiyəsinə dəyib və o, hadisə yerindəcə keçinib. Açılan atəş nəticəsində idarəetmədən çıxan avtomobil başqa bir nəqliyyat vasitəsinə çırpılıb və nəticədə Asimə ağır xəsarət alıb.

"Mənim qızım Şamsu Bibi 'TikTok' videoları çəkirdi və təxminən üç-dörd il idi ki, bu fəaliyyətlə məşğul olurdu", — deyə Sahibzadə şikayətində bildirib. "Onun 1.3 milyona yaxın izləyicisi var idi".

Mərhumun rəsmi "TikTok" hesabını axtarmaq cəhdləri nəticəsiz qalıb. Mərhumun qardaşı Rəhmətullah ailənin qətldən sonra Bibinin hesabını sildiyini açıqlayıb: "Hesabda 30-35 milyondan çox bəyənmə və bir milyondan artıq izləyici var idi".

O əlavə edib ki, Bibinin Kövsər və "Şahin" ləqəbli Cavid adlı şəxslərlə maliyyə əməliyyatları olub. Mərhum pulların geri qaytarılması tələbi ilə bağlı həmin şəxslərdən ölüm təhdidləri alıb və bununla əlaqədar İslamabadda onlara qarşı rəsmi şikayət də vermişdi.

"Məndə qızımın onun pullarını mənimsəmək məqsədilə ya birbaşa Kövsər və Cavid tərəfindən, ya da onların göndərdiyi bu naməlum şəxslər vasitəsilə qətlə yetirildiyinə inanmaq üçün güclü əsaslar var; bu işdə həmin 'Kaşi' ləqəbli Kaşifin də təhriki mövcuddur", — deyə Sahibzadə vurğulayıb.

O, adları qeyd olunan şübhəlilərə və iki naməlum şəxsə qarşı qanuni tədbirlərin görülməsini tələb edib. Sahibzadə bildirib ki, oğlu Nemətullah avtomobilə atəş açan şəxslər qarşısına çıxarılarsa, onları tanıya bilər.

Polis Sahibzadənin adlarını çəkdiyi şübhəlilər və naməlum şəxslər barəsində Pakistan Cinayət Məcəlləsinin 302 (qəsdən adam öldürmə), 324 (qəsdən adam öldürməyə cəhd), 109 (cinayətə təhriketmə) və 34-cü (ümumi niyyətin həyata keçirilməsi məqsədilə bir neçə şəxs tərəfindən törədilən əməllər) maddələri ilə cinayət işi açıb.