BAKI,VOA, Fərid Mikayılov

Türkiyə Xarici İşlər Nazirliyi İsrail rəsmiləri tərəfindən ortaya atılan iddiaların sistematik bir təbliğat fəaliyyəti olduğunu bildirib.

VOA xəbər verir ki, nazirliyin bəyanatında bu cəhdlərin Netanyahunun rəhbərlik etdiyi hökumətin Qəzzadakı soyqırımı və işğal siyasətini ört-basdır etməyə yetməyəcəyi vurğulanıb.

Sənəddə sözügedən iddiaların müəyyən bir koordinasiya və zamanlama ilə dövriyyəyə buraxıldığına diqqət çəkilərək, bunun genişmiqyaslı dezenformasiya kampaniyasının tərkib hissəsi olduğu qeyd edilib.

İsrail Baş naziri Benyamin Netanyahu və yaxın ətrafının özlərinə qarşı yönələn hər növ tənqidi qəsdən təhrif etdiyi bildirilən bəyanatda bu qiymətləndirmələrə yer verilib:

"Netanyahu və onun cinayət ortaqları özlərinə yönəldilən tənqidləri qəsdən təhrif edir, sistematik təbliğat fəaliyyəti ilə gündəmi dəyişməyə çalışırlar. Lakin bu cəhdlər artıq beynəlxalq ictimaiyyəti inandırmır; İsrail hökumətinin Qəzzadakı soyqırımını, bölgədəki işğal və ilhaq siyasəti ilə sabitliyi pozan addımlarını gizlədə bilmir."

Bəyanatın sonunda Türkiyənin məqsədinin bölgədəki bütün ölkə və xalqların sülh, sabitlik və rifah içində yaşaması olduğu xatırladılıb. Ankara bir daha İsraili konstruktiv və sülhsevər siyasət yürütməyə çağıraraq, doğruları söyləməyə davam edəcəyini bəyan edib.