BAKI,VOA Orxan Qədirzadə
Türkiyənin xarici işlər naziri Hakan Fidan NATO-nun Ankarada keçirilən 36-cı Zirvə Toplantısının ən çətin mərhələsinin ABŞ Prezidenti Donald Trampı sammitdə iştiraka razı salmaq olduğunu bildirib. Onun sözlərinə görə, bu məqsədə nail olunması ilə ən mühüm maneə aradan qaldırılıb.
Diplomatik mənbələrin məlumatına əsasən, Hakan Fidan bu fikirləri Türkiyə Xarici İşlər Nazirliyinin Strateji Araşdırmalar Mərkəzi (SAM) və Chatham House tərəfindən Ankarada təşkil olunan "Ankara Sammitindən sonra Avropa təhlükəsizliyi: NATO müttəfiqləri arasında əməkdaşlığın gücləndirilməsi" mövzusunda tədbirdə çıxışı zamanı səsləndirib.
Nazir bildirib ki, NATO yeni mərhələdə yalnız mövcud təhlükələrə reaksiya verən təşkilat kimi deyil, uzunmüddətli strateji təhlükəsizlik baxışını formalaşdıran alyans kimi fəaliyyət göstərməlidir.
Hakan Fidan qeyd edib ki, ABŞ ilə Avropa arasında müəyyən fikir ayrılıqları mövcud olsa da, bu ziddiyyətlərin NATO sammitində idarəolunmaz böhrana çevriləcəyi gözlənilmir. Onun sözlərinə görə, Donald Trampın sammitdə iştirakı mövcud problemlərin idarə olunması baxımından xüsusi əhəmiyyət daşıyır.
Nazir Avropa təhlükəsizliyinin yalnız Avropa İttifaqı çərçivəsində qiymətləndirilməsinin düzgün olmadığını vurğulayaraq, daha geniş və əhatəli yanaşmaya ehtiyac olduğunu bildirib.
O qeyd edib ki, Türkiyə bu təhlükəsizlik arxitekturasının əsas iştirakçılarından biridir. Fidan əlavə edib ki, Ankara Ukraynanın ərazi bütövlüyünü və suverenliyini dəstəkləməklə yanaşı, Rusiya ilə dialoq kanallarının açıq saxlanılmasını da Avropa təhlükəsizliyi üçün vacib hesab edir.
Nazirin sözlərinə görə, Avropanın müdafiə sənayesi potensialı yalnız Avropa İttifaqı üzvü ölkələrin imkanları ilə məhdudlaşdırılmamalıdır. Türkiyə və Böyük Britaniya kimi güclü müdafiə sənayesinə malik dövlətlər də Avropanın müdafiə əməkdaşlığının ayrılmaz hissəsi olmalıdır.
Hakan Fidan bildirib ki, Avropa ölkələri ABŞ-ın müdafiə xərclərinin bölüşdürülməsi ilə bağlı çağırışlarını təzyiq kimi deyil, daha çox məsuliyyət götürmək üçün stimul kimi qiymətləndirməlidirlər.
Nazir vurğulayıb ki, Avropanın müdafiə imkanlarının artırılması həm NATO-nun gələcəyi, həm də qitənin strateji dayanıqlılığı baxımından mühüm əhəmiyyət kəsb edir.
Hakan Fidan çıxışında NATO-nun Ankara sammitində Avropa ilə ABŞ arasında qarşılıqlı ittihamların ön plana çıxmayacağını da bildirib.
O qeyd edib ki, sammitin təşkilati baxımdan ən mürəkkəb mərhələsi Donald Trampın iştirakını təmin etmək olub və bu məsələ artıq uğurla həll edilib.
NATO sammiti çərçivəsində Hakan Fidan ABŞ Senatının NATO Müşahidə Qrupunun həmsədri və Senatın Xarici Əlaqələr Komitəsinin yüksəkvəzifəli üzvü Cinn Şahin, senatorlar Kristofer Kuns, Dik Durbin, Mayk Raunds və ABŞ Nümayəndələr Palatasının üzvü Mayk Törner ilə də görüş keçirib.
Nazir həmçinin sosial media hesabında paylaşım edərək Ankaranın NATO üzvlərini qəbul etməyə tam hazır olduğunu bildirib.
Fidan vurğulayıb ki, sammitdə qəbul olunacaq qərarlar yalnız mövcud təhlükəsizlik problemlərinə cavab verməyəcək, həm də gələcək illər üçün Avro-Atlantik təhlükəsizlik sisteminin inkişaf istiqamətlərini müəyyən edəcək.
Onun sözlərinə görə, Türkiyənin məqsədi daha koordinasiyalı, daha güclü imkanlara malik və daha dayanıqlı NATO-nun formalaşmasına töhfə verməkdir.