BAKI,VOA
22–25 iyun tarixlərində MÜSİAD-ın Niğde şöbəsinin İdarə Heyətinin sədri Hüsammettin Gümüştepenin rəhbərlik etdiyi nümayəndə heyəti MÜSİAD Azərbaycanın təşkilatçılığı ilə Azərbaycanda işgüzar səfərdə olub. Səfər çərçivəsində dövlət qurumları, biznes təşkilatları və istehsal müəssisələri ilə görüşlər keçirilib, Azərbaycan və Türkiyə iş adamları arasında əməkdaşlıq imkanları müzakirə olunub.
VOA xəbər verir ki, səfər çərçivəsində MÜSİAD Azərbaycan İdarə Heyətinin sədri Fuat Kayhan, MÜSİAD Niğde İdarə Heyətinin sədri Hüsammettin Gümüştepe və onları müşayiət edən nümayəndə heyəti Türkiyə Respublikasının Azərbaycandakı fövqəladə və səlahiyyətli səfiri Prof. Dr. Birol Akgünü ziyarət ediblər. Görüş zamanı Azərbaycan ilə Türkiyə arasında iqtisadi əlaqələrin inkişaf perspektivləri, qarşılıqlı investisiya imkanları və iş adamları arasında əməkdaşlığın genişləndirilməsi məsələləri müzakirə olunub.
Nümayəndə heyəti,həmçinin Kiçik və Orta Biznesin İnkişafı Agentliyi (KOBİA) və Azərbaycan Sahibkarlar Konfederasiyasında (ASK) keçirilən birgə görüşdə iştirak edib. Görüşdə KOBİA İdarə Heyəti sədrinin müavini Emil Hüseynli və ASK nümayəndələri tərəfindən tərəflərə Azərbaycanda sahibkarlığın inkişafı, kiçik və orta biznesə göstərilən dövlət dəstəyi, biznes mühitinin təkmilləşdirilməsi, sahibkarların maraqlarının qorunması və investisiya imkanları barədə ətraflı məlumat verilib, gələcək əməkdaşlıq perspektivləri müzakirə olunub.
Nümayəndə heyəti daha sonra MÜSİAD Azərbaycanın dərnək mərkəzini ziyarət edib. Görüş zamanı Fuat Kayhan və Hüsammettin Gümüştepe rəhbərlik etdikləri təşkilatların fəaliyyəti, üzvlərə təqdim olunan xidmətlər və həyata keçirilən layihələr barədə məlumat veriblər. Fuat Kayhan Azərbaycandakı əlverişli investisiya mühiti, ölkənin strateji coğrafi mövqeyi və MDB bazarlarına çıxış imkanları barədə ətraflı məlumat təqdim edib. Görüş çərçivəsində iki qurum arasında iqtisadi və ticari əməkdaşlığın genişləndirilməsi istiqamətində fikir mübadiləsi aparılıb.
Səfər proqramı çərçivəsində nümayəndə heyəti Azərbaycanın aparıcı istehsal müəssisələrindən olan №1 Çörək Zavodunu, həmçinin Vidal Özəl Sənaye Məhəlləsini ziyarət edib. №1 Çörək Zavodunda qonaqlara müəssisənin istehsal potensialı, müasir texnoloji istehsal prosesi və fəaliyyət istiqamətləri barədə məlumat verilib. Vidal Özəl Sənaye Məhəlləsində isə direktor Teyyub Cabbarov tərəfindən rezidentlər üçün yaradılmış müasir infrastruktur, investisiya imkanları və sənaye məhəlləsinin fəaliyyəti təqdim olunub. Sonda nümayəndə heyəti hər iki müəssisənin ərazisini gəzərək mövcud istehsal və sənaye infrastrukturu ilə yaxından tanış olub.
Səfər proqramının mühüm hissələrindən birini MÜSİAD Azərbaycanın təşkilatçılığı ilə MÜSİAD Niğde nümayəndə heyəti ilə yerli şirkətlər arasında keçirilən B2B görüşləri təşkil edib.Tədbirdə müxtəlif fəaliyyət sahələrini təmsil edən 50-yə yaxın yerli şirkət iştirak edib. İkitərəfli görüşlər zamanı tərəflər yeni tərəfdaşlıq, investisiya və ticarət imkanlarını müzakirə edib, gələcək əməkdaşlığın əsas istiqamətləri üzrə məhsuldar fikir mübadiləsi aparıblar.
İşgüzar proqramla yanaşı, nümayəndə heyəti Bakının tarixi və mədəni irsini əks etdirən görməli məkanlarla da tanış olub. Qonaqlar Azərbaycanın zəngin tarixi, qonaqpərvərliyi və dinamik inkişafı barədə xoş təəssüratlarla ölkədən ayrıldıqlarını bildirərək, gələcəkdə də Azərbaycan ilə əməkdaşlığın daha da genişləndirilməsində maraqlı olduqlarını ifadə ediblər.
