BAKI,VOA, Fərid Mikayılov

İspaniyanın aerokosmik şirkəti Airtificial ilə Türk Aviasiya və Kosmos Sənayesi arasında “Hürjet” təlim təyyarəsi üçün uçuş idarəetmə sistemlərinin istehsalına dair 16 milyon avrodan artıq dəyərdə müqavilə imzalanıb.

VOA xəbər verir ki, razılaşma çərçivəsində istehsal ediləcək uçuş idarəetmə “stick”ləri İspaniya Hava və Kosmos Qüvvələrinin istismarında olan F-5 təyyarələrini əvəz edəcək Hürjet proqramında istifadə olunacaq.

Çatdırılmaların növbəti beş il ərzində mərhələli şəkildə həyata keçirilməsi planlaşdırılır. Şirkət daha əvvəl də bu proqram çərçivəsində məhdud həcmli layihələrdə iştirak etdiyini və yeni müqavilə ilə ilk tədarüklərə başladığını bildirib.

Qeyd edək ki, İspaniya Müdafiə Nazirliyi TUSAŞ və Airbus tərəfdaşlığı çərçivəsində 30 ədəd qabaqcıl təlim təyyarəsinin alınmasını nəzərdə tutur. Layihənin ümumi büdcəsi 2,6 milyard avro təşkil edir və ilk təyyarələrin 2028-ci ildən etibarən təhvil verilməsi planlaşdırılır.

Sevilyadakı istehsal müəssisələrində hazırlanacaq sistemlər “fly-by-wire” texnologiyası və müasir elektron idarəetmə komponentləri ilə təchiz olunacaq. Bu texnologiyalar uçuş təhlükəsizliyinin təmin edilməsində və müxtəlif əməliyyat rejimlərinin idarə olunmasında mühüm rol oynayır.