BAKI,VOA, Fərid Mikayılov

Türkiyə Prezidenti Rəcəb Tayyib Ərdoğan parlamentdə çıxışı zamanı Hörmüz boğazı ətrafında yaranan enerji böhranına baxmayaraq ölkənin enerji təminatında sabitliyin qorunduğunu bildirib.

VOA xəbər verir ki, Ərdoğan son 23 ildə həyata keçirilən siyasətin nəticəsində Türkiyədə sənaye, kənd təsərrüfatı, turizm və nəqliyyat sektorlarının enerji təminatı ilə bağlı narahatlıq yaşamadığını vurğulayıb.

Qeyd olunub ki, ölkə enerji mənbələrinin şaxələndirilməsi və tədarükçü ölkələrin sayının artırılması istiqamətində ardıcıl addımlar atıb, eyni zamanda hidroenergetika, külək, günəş, geotermal və nüvə enerjisi sahələrində iri layihələr həyata keçirilib.

Bildirilib ki, Türkiyə xüsusilə neft və qaz axtarışı sahəsində ciddi irəliləyiş əldə edərək dünyanın aparıcı dərin dəniz donanmalarından birini formalaşdırıb.

Məlumata görə, Qara dənizdə aşkar edilən qaz yataqları hazırda milyonlarla evin enerji tələbatını qarşılayır və bu göstəricinin yaxın illərdə əhəmiyyətli dərəcədə artırılması planlaşdırılır.

Ərdoğan qeyd edib ki, 2026-cı ildə 8 milyon, 2028-ci ildə isə 16-17 milyon ev təsərrüfatının təbii qazla yerli mənbələr hesabına təmin olunması hədəflənir.