BAKI,VOA, Fərid Mikayılov

İstanbulun Beşiktaş rayonunda polis əməkdaşlarına qarşı törədilən silahlı hücumdan sonra İŞİD terror təşkilatına qarşı 34 vilayətdə eyni vaxtda əməliyyatlar keçirilib.

VOA xəbər verir ki, əməliyyatlar nəticəsində ümumilikdə 273 şübhəli barəsində tədbir görülüb, onlardan 198 nəfər saxlanılıb.

Bildirilib ki, Beşiktaşda yerləşən Yapı Kredi Plaza yaxınlığında baş verən hücum zamanı İŞİD-lə əlaqəli üç nəfərdən biri zərərsizləşdirilib, iki nəfər isə yaralı halda ələ keçirilib. Hadisə nəticəsində iki polis əməkdaşı yüngül xəsarət alıb.

Qeyd olunub ki, saxlanılan şəxslərin müxtəlif şəhərlərdə fəaliyyət göstərən terror şəbəkələri ilə əlaqələri araşdırılır.

Məlumata əsasən, əməliyyatlar çərçivəsində Yalova şəhərində baş verən silahlı qarşıdurma ilə bağlı da araşdırmalar aparılır. Həmin hadisə zamanı üç polis əməkdaşı həyatını itirib, bir neçə nəfər yaralanıb.

Bildirilib ki, təhlükəsizlik orqanları ölkə üzrə potensial terror təhdidlərinin qarşısını almaq məqsədilə tədbirləri davam etdirir.