BAKI,AzerVoice, Nailə Babazadə

Türkiyənin Xarici İşlər naziri Hakan Fidan Fransa Prezidenti Emmanuel Makronun ev sahibliyi ilə sabah Parisdə təşkil olunacaq Ukrayna mövzulu Könüllülər Koalisiyası Liderlər Zirvəsində iştirak edəcək.

AzerVoice xəbər verir ki, Türkiyə Xarici İşlər Nazirliyindəki mənbələrdən verilən məlumata görə, Hakan Fidan zirvədə Türkiyə Prezidenti Rəcəb Tayyib Ərdoğanı təmsil edəcək.

Zirvədə Ukraynada sülhün təmin olunması məqsədilə aparılan danışıqlar, mövcud sülh planı layihələrinin son durumu, eləcə də Ukraynaya veriləcək təhlükəsizlik zəmanətlərində Könüllülər Koalisiyasının oynaya biləcəyi rolun müzakirə olunması nəzərdə tutulur.

Nazir Fidanın zirvə zamanı Prezident Ərdoğanın ortaya qoyduğu baxış çərçivəsində Türkiyənin Rusiya–Ukrayna müharibəsində nəticəyönümlü diplomatik addımlarla sülh yolu ilə həllin tərəfdarı olduğunu vurğulaması gözlənilir. O, həmçinin 2025-ci ildə İstanbulun tərəflər arasında üç raund danışıqlara ev sahibliyi etdiyini, bu görüşlər nəticəsində xüsusilə əsir mübadiləsi də daxil olmaqla humanitar sahədə konkret nəticələrin əldə olunduğunu diqqətə çatdıracaq.

Fidanın Türkiyənin gələcək mərhələdə də tərəflər arasında keçirilə biləcək birbaşa danışıqlara ev sahibliyi etməyə hazır olduğunu yenidən bəyan etməsi, Ankaranın Qara dənizdə sabitliyin qorunmasını strateji prioritet hesab etdiyini və bu mövqeyini bütün tərəflərə xatırlatdığına diqqət çəkməsi də gözlənilir.