BAKI,AzerVoice, Fərid Mikayılov

Türkiyə prezidenti Rəcəb Tayyib Ərdoğan Türkmənistan səfərindən qayıdarkən jurnalistlərin suallarını cavablandırıb və Rusiya prezidenti Vladimir Putinlə görüşünü şərh edib.

AzerVoice xəbər verir ki, Ərdoğan bildirib ki, görüşdə əsas mövzu Rusiya-Ukrayna münaqişəsinin dayandırılması və sülh səyləri olub.

"Putinlə olduqca məhsuldar və dərin müzakirələr apardıq. Ona hər an hazır olduğumu bildirdim və ən qısa zamanda görüşməli olduğumuzu müzakirə etdik. O da mənə 'sözümü yerinə yetirəcəyəm' dedi. Ümid edirəm ki, bu səfər yaxın zamanda reallaşacaq", - deyə o bildirib.

Ərdoğan həmçinin vurğulayıb ki, Türkiyə ilə Rusiya arasındakı münasibətlər yalnız gündəlik maraqlara əsaslanan əlaqələr deyil. Onun sözlərinə görə, bu münasibətlər köklü tarix, güclü diplomatik baza və qarşılıqlı etimad üzərində qurulub.

Ərdoğan qeyd edib ki, Türkiyə münaqişənin tezliklə sona çatmasını dəstəkləyir və bu mövqeyi bütün tərəfdaşlara açıq şəkildə çatdırır.

"Görüş zamanı əsasən müharibə və sülh səylərini müzakirə etdik. Türkiyənin bu məsələdə mövqeyi bütün tərəfdaşlar tərəfindən yaxından bilinir"- deyə Ərdoğan bildirib.

Türkiyə lideri Türkmənistan səfərini həmçinin ölkənin daimi neytrallığının 30-cu ildönümü münasibətilə keçirilən tədbirlərlə əlaqələndirib və bu tədbirlərin BMT tərəfindən elan olunmuş “Beynəlxalq Sülh və Təhlükəsizlik İli” çərçivəsində keçirilməsinin mərasimlərə əlavə mənəvi dəyər qazandırdığını vurğulayıb.