BAKI,VOA,Yusif Şərifzadə

Böyük Britaniya hökuməti İran İslam İnqilabı Keşikçiləri Korpusunu (SEPAH) və İranla əlaqəli olduğu bildirilən "Haqq Yolunun Tərəfdarları İslami Hərəkatı"nı (IMCR) milli təhlükəsizliyə təhdid yaradan qurumlar siyahısına daxil edib.

VOA xəbər verir ki, Böyük Britaniya hökumətinin yaydığı açıqlamaya əsasən, bu qərardan sonra sözügedən təşkilatlara hər hansı dəstəyin ifadə edilməsi cinayət hesab olunacaq.

Rəsmi məlumata görə, bu qurumların fəaliyyətini tərifləyən, təşviq edən və ya onların Böyük Britaniyanın təhlükəsizliyini təhdid edən fəaliyyətinə dəstək verən şəxslər cinayət məsuliyyətinə cəlb oluna bilərlər.

Hökumət bildirib ki, həmin təşkilatlara yardım göstərmək, onlardan maddi gəlir əldə etmək və ya hər hansı ödəniş qəbul etmək də qanunla qadağan olunur.

Bu cinayətlərdə təqsirli bilinən şəxsləri 14 ilədək azadlıqdan məhrumetmə cəzası gözləyə bilər.

Açıqlamada qeyd olunur ki, qərar Böyük Britaniya parlamentinin daxili işlər nazirinin təqdim etdiyi sərəncamı təsdiqləməsindən sonra 2026-cı il Milli Təhlükəsizlik (Dövlət Təhdidləri) Qanunu çərçivəsində qəbul edilib.

Eyni qərarla Rusiyanın Baş Kəşfiyyat İdarəsi (GRU) ilə əlaqələndirilən Könüllülər Korpusu da milli təhlükəsizliyə təhdid yaradan qurumlar siyahısına əlavə edilib.

İran tərəfi Böyük Britaniyanın qərarına hələlik rəsmi münasibət bildirməyib.