BAKI, AzerVoice, Nərmin Ağayeva

HƏMAS, Türkiyənin Fələstin xalqına və Qəzza zolağına verdiyi dəstəyə görə minnətdarlığını ifadə edən bəyanat yayıb. Türkiyə Böyük Millət Məclisində (TBMM) keçirilən Qəzza sessiyasının yekunlarına dair açıqlama verən HƏMAS, Türkiyənin İsrailə qarşı ticarət əlaqələrini kəsməsi və hava məkanını bağlaması qərarını yüksək qiymətləndirib.

AzerVoice xəbər verir ki, TBMM sədri Numan Kurtulmuşun sədrliyi ilə keçirilən fövqəladə iclasda İsrailin Qəzzaya hücumları, Fələstin xalqına qarşı soyqırım və zülm siyasətləri müzakirə edilib. HƏMAS-ın bəyanatında Türkiyənin bu məsələdəki qəti mövqeyi və İsrailə qarşı tətbiq etdiyi sanksiyalar təqdir olunub. Xüsusilə, xarici işlər naziri Hakan Fidanın İsrailə ticarət əlaqələrinin kəsilməsi, limanların və hava məkanının bağlanması ilə bağlı açıqlamaları vurğulanıb.

HƏMAS bəyanatında Türkiyəni, ərəb və İslam ölkələrini, eləcə də dünya güclərini İsrailə qarşı sanksiyaları artırmağa, əlaqələri tamamilə kəsməyə və İsrail liderlərinin insanlığa qarşı cinayətlərə görə mühakimə olunmasını təmin etməyə çağırıb.

Fidan iclasda, “İsrail iki ildir ki, dünyanın gözü qarşısında Qəzzada soyqırım törədir,” – deyərək, İsrail hökumətini tarixin ən irqçi hökuməti adlandırıb. O, Fələstin müqavimətinin tarixin gedişatını dəyişəcək və məzlumların simvolu olacağını bildirib. Fidan, Türkiyənin İsrailə qarşı addımlarının dünyada misilsiz olduğunu qeyd edərək, “Biz İsraillə ticarətimizi tamamilə kəsdik, limanlarımızı və hava məkanımızı onların üzünə bağladıq. Heç bir ölkə bu qədər qəti addım atmayıb,” – ifadəsini işlədib.