BAKI, AzerVoice, Nərmin Ağayeva

Türkiyənn Milliyyətçi Hərəkat Partiyasının (MHP) sədri Devlet Bahçeli 30 Avqust Zəfər Bayramı münasibətilə verdiyi mesajda, Türk millətinin 103 il əvvəl düşmənsiz Türkiyəyə nail olduğunu, indi isə terrordan azad bir vətənə çatmağa qərarlı olduğunu bildirib.

AzerVoice xəbər verir ki, Bahçeli yazılı açıqlamasında, “Türk milləti 103 il əvvəl qanı və canı ilə düşmənsiz Türkiyəyə nail oldu, indi də Allahın izni ilə terrorsuz Türkiyəyə çatacaq,” – deyə qeyd edib. O, daxili və xarici düşmənçiliklərin terrorsuz Türkiyə ilə təsirini itirəcəyini vurğulayıb.

Bahçeli, avqust ayının Türk milləti üçün zəfər ayı olduğunu, 26 avqust 1922-ci ildə başlayan Böyük Hücumun 30 avqustda zəfərlə taclandığını xatırladıb. O, bu qələbənin strateji hazırlıq, siyasi taktika və müstəqillik ehtirası ilə əldə edildiyini, Türk millətinin birliyi və şəhidlərin qanı ilə möhkəmləndiyini bildirib.

MHP lideri, “Dumlupınardakı qələbə Ankaranın siyasi dinamikasını bərqərar etdi və Türkiyə Cümhuriyyətinin damını qurdu. Bu dam yıxılmayacaq, çürüməyəcək,” – deyə əlavə edib. Bahçeali, Türk millətinin heç bir itkiyə və məhvə dözməyəcəyini, şəhidlərin ruhlarının və ataların xeyir-duasının Türkiyəni əbədi qoruyacağını vurğulayıb.

O, 30 Avqust Zəfər Bayramını təbrik edərək, Qazi Mustafa Kamal Atatürk və Qurtuluş Döyüşünün şəhidlərini ehtiramla yad edib.