BAKI, AzerVoice, Nərmin Ağayeva

Türkiyə Müdafiə Sənayesi prezidenti Haluk Görgün, ROKETSAN tərəfindən hazırlanan Milli Şaquli Atış Sistemi (MİDLAS) və TCG İSTANBUL-dan HİSAR-D RF raketi ilə həyata keçirilən atış sınağının uğurla tamamlandığını açıqlayıb.

AzerVoice xəbər verir ki, sınaq zamanı ASELSAN, HAVELSAN, STM və ROKETSAN kimi şirkətlərin hazırladığı milli sistemlər tam koordinasiyada işləyib.

Görgün qeyd edib ki, bu sınaq dəniz qüvvələri üçün hazırlanan radarlardan atəşə nəzarət sistemlərinə qədər kompleks həllərin etibarlılığını sübut edib. O, layihədə iştirak edən bütün şirkətlərə və mühəndislərə təşəkkür edib.

Sinop sahillərində keçirilən sınaqda ASELSAN tərəfindən hazırlanmış CENK 400-N 4D Axtarış Radarı, AKREP 300-N Atəş Nəzarət Radarı, HİSAR-D Atəş Nəzarət Sistemi və digər milli texnologiyalardan istifadə olunub. Raket, hədəfi aşkar edərək izləyib və uğurla zərərsizləşdirib.

Qeyd edək ki, MİDLAS sistemi Türkiyənin döyüş gəmilərində milli imkanlarla şaquli atış qabiliyyətinin inkişaf etdirilməsi məqsədilə hazırlanıb və bu uğurlu sınaq sistemin etibarlılığını bir daha təsdiqləyib.