BAKI, Azervoice, Nərmin Ağayeva

Türkiyədə 45 general təqaüdə göndərilib , generalların ümumi sayı isə 16 nəfər artıb.

Azervoice xəbər verir ki, Türkiyə Ali Hərbi Şurasının iclasının qərarına əsasən, 2-si yaş həddi, 43-ü isə vəzifə çatışmazlığı səbəbindən olmaqla ümumilikdə 45 general və admiral təqaüdə göndərilib.

30 avqust 2025-ci ildən etibarən general və admiral sayı 316-dan 332-yə yüksələcək.

Prezident Rəcəb Tayyib Ərdoğanın sədrliyi ilə keçirilən iclasda 32 general və admiral növbəti rütbəyə, 61 polkovnik isə general və admiral rütbəsinə yüksəldilib. 29 generalın səlahiyyət müddəti bir il, 478 polkovnikin isə iki il uzadılıb.

Qeyd edək ki, Baş Qərargah rəisi General Metin Gürak də təqaüdə göndərilib. Onun yerinə Quru Qoşunları komandanı General Səlcuq Bayraktaroğlu təyin olunub. 1-ci Ordu komandanı General Metin Tokel isə Quru Qoşunları komandanı olub. Dəniz Qüvvələri komandanı Admiral Ərcüment Tatlıoğlu və Hərbi Hava Qüvvələri komandanı General Ziya Cemal Kadıoğlunun səlahiyyət müddəti bir il artırılıb.