BAKI, AzerVoice

Türkiyə, Balkan regionunda dialoq və əməkdaşlığı gücləndirməyə yönəlmiş yeni diplomatik təşəbbüsə start verir.

AzerVoice xəbər verir ki, Türkiyə Xarici işlər naziri Hakan Fidanın ev sahibliyi ilə İstanbulda “Balkan Sülh Platforması”nın ilk toplantısı keçirilir.

Diplomatik mənbələrin verdiyi məlumata görə, bu gün keçiriləcək toplantıya Bosniya və Herseqovina, Monteneqro, Kosovo, Şimali Makedoniya və Serbiya xarici işlər nazirləri, Albaniyadan isə nazir müavini səviyyəsində iştirak gözlənilir.

“Balkan Sülh Platforması”nın yaradılmasında əsas məqsəd regionda davamlı sülhün bərqərar olunması, qarşılıqlı etimadın qurulması və əməkdaşlığın gücləndirilməsidir. Platforma regional problemlərin həllində yerli sahibkarlıq prinsipini və birgə qərar mexanizmini ön plana çəkir.

Toplantının qeyri-rəsmi istişarə formatında keçirilməsi planlaşdırılır.
Görüş zamanı Hakan Fidanın nəqliyyat, enerji və rabitə sahələrində konkret əməkdaşlıq layihələrini gündəmə gətirəcəyi, regiondakı təhlükəsizlik risklərinin azaldılması və regional inteqrasiyanın gücləndirilməsi mövzularına diqqət yetirəcəyi gözlənilir.

Toplantı çərçivəsində nazir Hakan Fidanın iştirakçı ölkələrin nümayəndələri ilə ikitərəfli görüşlər keçirməsi də planlaşdırılır.