BAKI, AzerVoice

Türkiyə BMT-də İsrailin Suriyanın sabitliyini pozduğunu bəyan edib.

AzerVoice xəbər verir ki, bu barədə Türkiyənin BMT-dəki daimi nümayəndəsi Əhməd Yıldız BMT Təhlükəsizlik Şurasında keçirilən “Yaxın Şərqdə vəziyyət” mövzusunda iclasda çıxış edib.

O, İsrailin Suriyaya qarşı davam edən hərbi təcavüzünün ölkənin ictimai harmoniya və yenidənqurma səylərini ciddi şəkildə baltaladığını bildirib.

O qeyd edib ki, Türkiyə əvvəldən Suriya xalqının sülh və bərpa cəhdlərini dəstəkləyib və bu prosesə zərbə vuran bütün addımlar pislənməlidir. Yıldız həmçinin Suriyada sabitliyin bərpası üçün atəşkəs təşəbbüslərinin dəstəklənməsinin və İsrailin hərbi hücumlarının dərhal dayandırılmasının vacibliyini vurğulayıb.

Qeyd edək ki, İsrail iyulun 16-da Suriyanın müxtəlif bölgələrinə – o cümlədən Prezident iqamətgahı, Baş Qərargah və Müdafiə Nazirliyinə hava hücumları həyata keçirib. Həmin gün Süveydada Suriya hökuməti ilə yerli silahlı qruplar arasında atəşkəs əldə olunsa da, bölgədə qarşıdurmalar və hücumlar nəticəsində yüzlərlə insan həyatını itirib.