BAKI, AzerVoice

Türkiyənin Xarici İşlər Nazirliyi İsrailin çağırışlarına sərt reaksiya verib.

AzerVoice xəbər verir ki, Türkiyənin Xarici İşlər Nazirliyi İsraildə hakim koalisiyanın nazirlərinin İordan çayının qərb sahilinin özünə birləşdirməsinə dair çağırışlarına kəskin şəkildə etiraz edib və bu bəyanatları beynəlxalq hüquqa zidd addım kimi qiymətləndirib.

"İsrailli nazirlərin və siyasətçilərin İordan çayının qərb sahilinin birləşdirilməsi ilə bağlı açıqlamalarını qətiyyətlə rədd edirik. Bu kimi məsuliyyətsiz bəyanatlar, beynəlxalq hüquqa zidd olan məskunlaşma siyasətinin və işğalı daimi etməyə yönəlmiş səylərin açıq göstəricisidir." - deyə Nazirliyin açıqlamasında bildirilir.

Qeyd edilib ki, bu tip çağırışlar bölgədə gərginliyi artırmaqla yanaşı, Fələstin xalqının fundamental hüquqlarının pozulmasına səbəb olur.
"Fələstin ərazilərinə sistematik müdaxilələr və zorakı köçürmə siyasəti bölgədə sabitliyi daha da pozur. Biz bir daha vurğulayırıq ki, Yaxın Şərqdə davamlı sülh və sabitlik yalnız Fələstin xalqının qanuni hüquqları tanındıqda və paytaxtı Qüds olan müstəqil dövlət qurulduqda mümkündür." - deyə açıqlamada qeyd edilib.

Qeyd edək ki, İsrailin hakim "Likud" partiyasının nazirləri Baş nazir Benyamin Netanyahunun diqqətinə məktubla müraciət edərək, parlament yay tətilinə çıxmazdan əvvəl İordan çayının qərb sahilinin özünə birləşdirməsini tələb ediblər. Ədliyyə naziri Yariv Levin isə məsələ ilə bağlı açıqlamasında bu dövrü "tarixi fürsət" adlandırıb və ilhaqın gerçəkləşdirilməli olduğunu bildirib.