BAKI, AzerVoice

Rusiya və Ukrayna ilə təmaslarımız davam edəcək.

AzerVoice xəbər verir ki, Prezident Rəcəb Tayyib Ərdoğan Macarıstanda keçirilən Türk Dövlətləri Təşkilatının Qeyri-rəsmi Zirvə Toplantısında çıxış edərək TDT-nin keçdiyi yolu və gələcək hədəflərini dəyərləndirib.

Ərdoğan təşkilatın bu gün örnək səviyyəyə çatdığını bildirib və qarşıda duran çağırışlar qarşısında birlik mesajı verib.

Ərdoğan çıxışında Macarıstanın Baş naziri Viktor Orbana səmimi ev sahibliyinə görə təşəkkür edib, təşkilatın hazırkı sədri Qırğızıstan Prezidenti Sadır Çaparova isə uğurlar arzulayıb.

“Biz təhlükəsizliyimiz üçün ən ciddi sınaqlardan biri olan Rusiya-Ukrayna müharibəsinin təsirlərini dərindən hiss edirik. Tərəflərin bu yaxınlarda İstanbulda görüşməsi mühüm hadisə idi. Biz hər iki ölkə ilə ədalətli və davamlı sülhə nail olmaq üçün intensiv təmaslarımızı davam etdirəcəyik”, – deyə Ərdoğan qeyd edib.

O, eyni zamanda Suriyada uzunmüddətli qarşıdurmadan sonra sabitliyin təmin olunması istiqamətində də Türkiyənin səylərinin davam etdiyini bildirib. Onun sözlərinə görə, bu təşəbbüslər yalnız region daxilində deyil, qlobal miqyasda sabitlik üçün vacibdir.

Prezident Ərdoğan çıxışı zamanı Nobel mükafatçısı professor Aziz Sancarın tədbirdə iştirakından məmnunluğunu ifadə edib. O, Bişkek sammitində qəbul edilən qərara uyğun olaraq Sancara “Əlişir Nəvai” Beynəlxalq Mükafatının təqdim ediləcəyini bildirib və gəncləri onun elmi yolunu davam etdirməyə çağırıb.

Qeyd edək ki, toplantı çərçivəsində Budapeşt Bəyannaməsi imzalanıb. Prezident Ərdoğan yekun çıxışında Türk dünyasının qarşılıqlı hörmət və qardaşlıq əsasında birliyini davam etdirəcəyinə inandığını bildirib.