BAKI, AzerVoice, Nailə Babazadə

2025-ci ilin ikinci rübündə Türkiyə iqtisadiyyatı ötən ilin eyni dövrü ilə müqayisədə 4,8 faiz artım göstərib. Bu göstərici ilə fasiləsiz iqtisadi artım 20-ci rübə daşınıb.

AzerVoice xəbər verir ki, tikinti sektoru ilin ikinci rübündə ən yüksək artım tempini nümayiş etdirərək 10,9 faiz böyüyüb. İnformasiya və kommunikasiya sahəsində 7,1 faiz, sənaye sektorunda isə 6,1 faiz artım qeydə alınıb. Ticarət, nəqliyyat, turizm və iaşə xidmətləri 5,6 faiz, peşə, inzibati və dəstək xidmətləri isə 5,4 faiz yüksəlib.

Maliyyə və sığorta fəaliyyəti ilə daşınmaz əmlak sektoru ayrı-ayrılıqda 2,6 faiz artım nümayiş etdirib. Digər xidmət sahələrində isə bu göstərici 2,1 faiz olub. Məhsul üzərində vergilər – subsidiyalar fərqində 3,0 faiz artım qeydə alınıb.

Bəzi sahələrdə isə azalma müşahidə edilib. Kənd təsərrüfatı sektoru 3,5 faiz, dövlət idarəçiliyi, təhsil, səhiyyə və sosial xidmətlər isə 1,2 faiz geriləyib.

Mövsümi və təqvim təsirlərindən təmizlənmiş ÜDM indeksi əvvəlki rüblə müqayisədə 1,6 faiz artıb. Təqvim təsirindən təmizlənmiş ÜDM isə ötən ilin eyni dövrü ilə müqayisədə 4,6 faiz yüksəlib.

Nominal ÜDM əvvəlki ilin ikinci rübünə nisbətən 43,7 faiz artaraq 14 trilyon 578 milyard 556 milyon türk lirəsinə çatıb. ABŞ dolları ilə ifadədə bu rəqəm 377 milyard 622 milyon olub.

Əhali tərəfindən həyata keçirilən son istehlak xərcləri 5,1 faiz artıb. Dövlətin istehlak xərcləri isə 5,2 faiz azalıb. Əsas kapital qoyuluşunda isə 8,8 faiz artım müşahidə olunub.

İxrac göstəriciləri 1,7 faiz artarkən, idxalda 8,8 faiz yüksəliş qeydə alınıb.

Əmək haqqı ödənişləri ötən ilin eyni dövrünə görə 42 faiz artıb. Xalis müəssisə gəliri və ya qarışıq gəlir isə 46,3 faiz artım göstərib.

Əmək ödənişlərinin ümumi daxili məhsuldakı payı 38,8 faizdən 38,4 faizə düşüb. Eyni dövrdə müəssisə gəlirinin payı isə 39,5 faizdən 40,2 faizə yüksəlib.